الرئيسية > آراء > علاش المغاربة كايفضلو يدوزو الكونجي برا؟ ماشي غير حيت كايقلبو على سيرفيس مزيان ! راه الناس عندها جوع كبير للحرية ! بعيدا عن العقلية البوزبالية المتزمتة لي كاتحارب السعادة و الجمال!
21/08/2019 16:00 آراء

علاش المغاربة كايفضلو يدوزو الكونجي برا؟ ماشي غير حيت كايقلبو على سيرفيس مزيان ! راه الناس عندها جوع كبير للحرية ! بعيدا عن العقلية البوزبالية المتزمتة لي كاتحارب السعادة و الجمال!

علاش المغاربة كايفضلو يدوزو الكونجي برا؟ ماشي غير حيت كايقلبو على سيرفيس مزيان ! راه الناس عندها جوع كبير للحرية ! بعيدا عن العقلية البوزبالية المتزمتة لي كاتحارب السعادة و الجمال!

سهام البارودي – كود//

عدد المغاربة لي كايفضلو يقطعو البحر باش يدوزو الكونجي غادي و كايطلع عام على عام ! غير ف 2018 تقريبا مليون توريست مغربي مشاو لسبانيا و هادي غي سبانيا بوحدها ماهضرناش على فرانسا و الطاليان و هولاندا و تركيا و الوجهات الآسيوية فحال الهند و التايلاند …! تخايل معايا الآلاف و الملايين من المغاربة كل عام كايوجدو و يجمعو الوراق و يدفعو الفيزا و يخلصو فلوس صحيحة فالوثائق و الرونديفوات و الطيارات و لوطيلات باش يمشيو يدوزو ليفاكونص فبلادات اخرى في حين بلادهم مسمية راسها ” بلد سياحي ” و عندها مؤهلات طبيعية ضخمة ! آلاف الكيلوميترات على البحر ! شواطئ ! جبال ! صحاري ! و هاكاك ! بزاف ديال المغاربة كايفضلو يهربو ! علاش ؟!

السبب الأول و المهم بزاف هوا الحرية لي كايحسو بيها هاد الناس برا و لي ماكاتوفرش هنا ! اليوم بزاف ديال البنات و الاولاد من الطبقة المتوسطة كايفضلو يقطعو ديك خمسطاشر كيلوميتر لي كاتفرق بين المغرب و سبانيا باش يعيشو حياتهم كيما بغاو ! يلبسو الصايات ! يتبرعو فالمايوات ! يعومو عريانين ! ياكلو و يشربو شنو بغاو! يشطحو ! يمارسو حياتهم بشكل طبيعي بلا مايدخلو فيهم لا فيدورات لا جيران لا بوليس ! كايسافرو ليكوبل من هنا باش يكون عندهم الحق ياخدو شومبر فلوطيل بلا مايطلبو ليهم عقد الزواج ! كاينين عيالات ربات بيوت كايسافرو باش يحيدو الدرة لي مفروضة عليهم ! كايسافرو و كايخسرو فلوس صحيحة و عملة صعبة مهمة حيت مالاقينش الحرية لي باغينها فبلادهم!

بنادم فاش كايبغي ياخد كونجي ! كايبغي يرتاح ! يبعد على بوزبال و عقلية بوزبال و ستريس بوزبال ! معامن غادوز الكونجي معامن ؟  لابغيتي تمشي تبحري هنا غا فبوزنيقة خاصك دي معاك هراوة باش تحمي راسك ! عينين بوزبال غاتقب ليك المايو بالليزر و تعرف شنو كاين لداخل ! البحورة و البيسينات تدعششو ! العيالات مابقاوش كايلبسو المايوات ولاو كايعومو بالدرابل و لي كاتعوم بمايو كاتبان وسط منهم قحبة ! كايشوفوها قحبة و لاكان معاها راجل راه اوطوماتيكمو كايتسمى ديوثي ! مايمكنش تلبسي لي بغيتي و تساراي فين مابغيتي ! تكونو كوبل و تبغيو تسافرو بجوج فالمغرب و تبرعو فحال اي كوبل شاب فرنسي و لا اسباني و لا حتى سينيغالي و لا كاميروني  ! لا لا لا نتوما الگنس الصگع المسخوط فبلادكم الدولة براسها مخلية شغالها و مقابلة ليكم تراميكم ! ماغايقبلوكمش لوطيلات و تا لاقبلوكم غايبتزوكم ! غايبتزكم لوطيل و السمسار و العساس د الموبل و الگارديان ديال الطوموبيلات و اي واحد شم فيكم ريحة ميمي !

الحرية لي ماكايناش و جودة الخدمات لي ناقصة و الاثمنة الخيالية بالمقارنة مع الجودة و عدم توفر الامكانيات السياحية فبزاف ديال المناطق فالمغرب لي عندها امكانيات طبيعية هائلة ! هادو هوما المشاكل لي واقفين فوجه السياحة فالمغرب و مادامت ماكايناش الحرية ! مادامت المرا كايشوفو فيها الرجال فالبحر و الشارع بعقليات بوزبالية و مادام التعامل مع الانسان مبني على حلال حرام حشومة ويلي عيب ماشي على اساس قوانين وضعية تحترم حرية الانسان … راه ماعمر السياحة ماغادي تطور ! حيت السياحة هي التفواج و التفواج هوا الحرية و سدينا !

راه تا السعودية فيها البحر و الصحرا و الجبل ولكن شكون غايهز الباراصول و يمشي يدوز فيها الكونجي ؟

موضوعات أخرى