سعيد الشاوي كود//

منين كتسمع وتشوف أن 95 فالمائة من المحامين كيخلصو قل من 10.000 درهم ديال الضريبة فالعام… القضية كتصدم.

هذا كيعني أن 95 فالمائة من المحامين المغاربة كيأديو ضريبة على أساس تصريحهم لإدارة الضرائب، أي بحال إلى أجرهم الشهري كيقل على خمسة آلاف درهم تقريبا… وهو ما يجعل، فظل هاد الأرقام المذكورة، مدخولهم قل من أجور موظفين وأجراء بساط ودوي أجور هزيلة وكتقطع ليهم الدولة ضرائب كثر من 95 فالمائة أي أكثر من المحامين.

صحيح كاينين محامين الله يحسن العون… ولكن ماشي نسبة ديال 95 فالمائة، هاد الخمس آلاف درهم فالشهر بيها كيوكل أسرتو ويقري وليداتو فالمدارس الحرة، ويداويهم فالكلينيك، ويدوزو العطلة ويخلص الطريطات ديال الفيلا ويبدل السياره ..، 5000 درهم فيها هاد البركه كلها ؟؟ وغيرهم كيتخلص بنفس الأجر أو كثر ماكيقدر يخلص تا الكرا ديال الدار..

هاد 95 فالمائة من المحامين لي الدخل ديالهم بهاد الدرجة من الهشاشة كيفاش النقابات ديالهم كتطلب منهم حتى لـ50 مليون باش يلتحقو بالمهنة؟؟؟ كي غيدير 95 فالماية من هاد المحامين تا يعيش بـ5000 درهم ويرجع 50 مليون لي خلص فالأول؟.

مزيان المحامين يكونو متاحدين ومتفاهمين ولي بغيناه بالنضال يكون يكون …. ولكن مهنة المحاماة مهنة شريفة وهدفها تحقيق العدالة،. والعدالة ماكينش غير فالمحاكم …. كاين العدالة الاجتماعية وكاينة العدالة الضريبية…

را منين شي مواطن أو شي مؤسسة كتخلص الضرائب ديالها كتساهم فالعدالة الضريبية، وتطور المجتمع والنهوض بأوضاع المحتاجين، وكل ماساهم الجميع بالضرائب لي عليه كل ما هاد الضرائب يمكن تنقص وما يبقاوش يتحملوها غير الموظفين والأجراء…

صحيح الضرائب فالمغرب خصها تراجع، ولكن خص كل واحد يأدي لي عليه ويغوت… وكل واحد يأدي لي عليه من مقاولات وأطباء ومهندسين وتجار وصحاب المهن الأخرى ماشي غير الموظفين والأجراء ومؤسسات الدولة.. يعني الحيط القصير… ومنين غادي تكثر المداخيل را داكشي كيساعد باش تنقص الضرائب.

صحيح مقابل الضرائب المواطنين خصهم يلقاو خدمات… ولكن هادي راها على كلشي… مرحبا تكون عدالة فالنضال وعدالة فالضرائب وعدالة فالمحاكم.

تصورو معايا غدا سائقي القطارات أو الطائرات أو السبيطارات ينوضو يقولو مبغيناش نخلصو هاد الضرائب بحال غيرنا ويخليو القطاعات واقفة ولي بغا يضيع يضيع ولي بغا يموت يموت حتى الدولة دير ليهم الخاطر وضرب عين ميكا على التملص الضريبي … أشمن عدالة بقات؟؟؟ القوي غياكل الضعيف؟.