محمد سقراط-كود////
ديما كيبانو فيديوات ديال مواطنين هازين المرضى ديالهم أو شي مراة حاملة فوق محمل ديال الموتى أو خشبة عادية وهابطين بيها لأقرب طريق باش يديوها للطبيب، وهاد الفيديوات كيجروا معاهم بزاف ديال التعليقات من نوع المغرب باقين الناس كيموتوا فيه في الجبال حيت مكيلقاوش لي يداويهم، هادشي فيه نسبة من الصحة لا من ناحية الأطباء لي مكيبغيوش يمشيو يخدمو في دوك المناطق، ولا من ناحية الدولة لي مموفراش ظروف اشتغال محترمة، وهادشي راه حتى في المدينة دابا نيت سير لسبيطار الغساني في فاس غادي تلقاه عبارة على متاهة للمرضى والطاقم الطبي مبني هادي قرن وزمارة وكل بناية بعيدة على الخرى، وفيه عرام ديال البيروقراطية، ومن ناحية خرى راه كاين قرى ومناطق في المغرب كتلقى كل أسرة أو جوج ساكنين في جبل ماغاديش تدير ليهم الدولة سبيطار وطريق وقيادة وبريكاد دالجوندارم ومدرسة ليهم بوحدهم.
لذا علاش الدولة المغربية ماتستلهمش تجربة الكيبوتس الإسرائيلية الرائدة وتجمع سكان بعض القرى والبوادي في كيبوتسات منها الزراعي ومنها الصناعي، عوض يبقى كل واحد داير دار في راس الجبل أو غير في الخلى والقفار ويتسنى الدولة توصليه الطريق وباقي الخدمات ليه بوحدو، وفي نفس الوقت تقدر تحد حتى من أثار الجفاف والهجرة القروية والبطالة، كاين صناعات خفيفة كثيرة يمكن ترحيلها من المدن للكيبوتسات، مثلا هادوك المعامل ديال الخياطة الصغار لي منتاشرين في كازا وطنجة، أغلب لي كيخدموا فيهم هوما بنات ودراري من ضحايا الهدر المدرسي والفقر والحاجة، وكيظطرو يعيشو حياة الماعز في مدن كبيرة وغالية في المقابل كيخدموا ساعات كثيرة بصالير قليل السميك أو قل، ومن هاد الصالير خاصهم يكريو في مدن العقار فيها خاصك تبيع كلوة باش تشري دار وشوف تشوف، والى بغاو يكريو رخاص غادي يسكنوا في أحياء هامشية فين الفقر والجريمة وانعدام الأمن، وغادي يتكرفصوا في النقل باش يوصلوا لأماكن العمل، إذن علاش مايتداروش كيبوتسات على الطريقة الإسرائيلية راهم بحال الجنة وتجربة ناجحة ومساهم كبير في الاقتصاد الإسرائيلي.
لذا علاش مايداروش كيبوتسات في نواحي وزان مثلا أو تاونات وتازة وصفرو وميدلت وعين بني مطهر وأغبالة، وإيكودال، ويتم جمع السكان المتفرقين في هاد النواحي في كيبوتسات ويدارو ليهم معامل صغيرة وأوراش فيها يخدموا، وهاهوما ساكنين مع ناسهم ممحتاجينش الهجرة والكرى والتحنسير وسيفط لداركم، راه كيبوتسات إسرائيل كينتجوا ملايين الدولارات وكيساهموا في اقتصاد البلاد، وعندهم صناعات لا يستهان بها منها تقطيع الألماس، في الحالة ديالنا هادي صعيبة، ولكن مع تقنين الكيف علاش مايدارش كيبوتس خاص بزراعة الكيف وتصنيع منتجات طبية وتجميلية منو، هذا يتدار نواحي وزان والله حتى يصدق ويكون تجربة رائدة ، يدار بين زومي وعين الدفالي أو في جرف الملحة، قريب للمناطق المنتجة وفي نفس الوقت قريب للميناء من أجل التصدير، حنا أجيال وارا أجيال شفنا كيفاش نجحات الكيبوتسات في إسرائيل وكيفاش ولات قادرة تغير خريطة منطقة، نحاولو نتعلموا منها ماشي بالضرورة نغيروا خريطة المنطقة حتى حنا، ولكن على الأقل يولي الناس في المناطق النائية في المغرب كيساهموا في اقتصاد البلاد وكيستافدوا من الخدمات ديال الدولة، راه كاين هنا حدا فاس في طريق موزار واحد التجربة من عهد الحسن الثاني لشبه كيبوتس، جمع ناس وعطاهم أرض كبيرة على شكل دائرة كل واحد عندو طرف منها، وعلى شكل الأراضي في الكيبوتسات الإسرائيلية، فايت مشيت ليها صدفة بالبيكالة ولكن معنديش معلومات عليها، راه في الخريطة كتبان بحال كيبوتس إسرائيلي.