محمد سقراط-كود///

داك النهار جابتها الوقت ومشيت ندوز في سبيطار الغساني السيئ الذكر بسباب فضيحة الاتجار في الرضع، جاب الله مشيت ليه كبير مطيح السنان أما كون شد فيا شي سيكوريتي جوج باكيات دالكارو، السبيطار كبير ومبني على طراز قديم غير عمليب لشنو كيتستخدم ليه حاليا، المستعجلات في قنت و فين غادي تدوز الراديو في قنت آخر، والطاقم الطبي أغلبه مشا للحبس أو هاجروا لألمانيا، بقاو شوية ديال الأفراد المعقولين راهم كيديرو خدمة عشرة دالناس تم في بيئة غير مشجعة على الخدمة نهائيا، وعادي جدا أننا نسمعوا أن البعض منهم هاجر لبرا واخا يخدم بنفس الصالير لي كان عندو هنا ولكن على الأقل في ظروف إنسانية ومهنية أفضل وبزاف، وهادي حاليا مشكلة كبيرة بزاف للدولة وللمغاربة، كولشي كيهرب راه ماشي غير الأطباء كاع المشتغلين بقطاع الصحة وكاع خريجي المدارسى العليا سواء التجارة أو الطب أو الهندسة راه نسبة كبيرة كيهربوا، وللأسف الدولة عوض تستاغل هاد الطلب على الكفاءات المغربية باغا تخرج قوانين تمنع هاد النزيف لي واقع في سوق الشغل المغربي.

كوبا جزيرة سكانها 11 مليون فقط محاصرة ومعاقبة تقريبا خمسين عام هادي ومع ذلك الدخل ديالها من الأطباء لي كتصدرهم للخارج فايت عشرة دالمليار دولار راه فايتة سبعة في المية من اقتصاد المغرب، وهاد الرقم مقارب لتحويلات المغاربة في الخارج كلهم بالأطباء والمهندسين والبزنازة والشفارة دالبزاطم في الميترو، مثلا البرتغال كانت كتعطي لكوبة خمسين مليون مغربية على كل طبيب كوبي يخدم فيها، وكذلك البرازيل والجزائر وفينيزويلا كانت كتعطيها البترول مقابل الأطباء، ومن غير الأطباء عندك دولة بحال الفيلبين مخرجة عشرة دالمليون عامل، غير العمال في المجال البحري هي اللولة في العالم وكيسيفطو بوحدهم تمنية دالمليار دولار في العام تحويلات، عاد زيد الخدامات ديال الديور والعديد من العمال حتى ديال قطاع الصحة، أي دولة بغات عمال كتسيفطهم ليها الفيليبين وفي المقابل راه كيسيفطو كثر من تلاتين مليار دولار كتدخل للخزينة ديال البلاد، المغرب راه كيولد ويكبر ويقري ويداوي وفي اللخر كيهربوا ليه لبرا بشهادة عليا ويخليوه حاصل.

علاش الدولة المغربية ماتاخدش من كوبا قدوة في التعامل مع الأطباء وهجرة الأدمغة عموما وتولي هي تصدرهم عوض يهربوا ليها من بعد ماتخسر عليهم الملايين في قرايتهم وتكوينهم خاص الدولة تسيفط الأطباء لفرنسا وألمانيا ولكن صاليرهم يدوز للدولة ديريكت باش يصرفوا شي رئيس جماعة قروية على الشيخات، ويتعطى للأطباء غير مصروف الجيب واحد المدة معينة حتى يردو للدولة ماهم مدينين لها به، وداك الساعة الله يعاونهم يمشيو ولا يجيو، أما باش الطبيب غير يكمل قرياتو لغد ليه يصبح شاد الطيارة ماشاف ماتشوف وضاعت فيه الدولة وضاع الشعب وربح راسو، العمال المغاربة بصفة عامة كيهربوا من المغرب بقوارب الموت وكيغامروا بحياتهم وكيبتاكروا طرق جديدة كل مرة باش يحركوا، مرة على تركيا كاين لي ضارب أدغال أمريكا اللاتينية كلها باش يوصل لميريكان، علاش الدولة ماتوليش تسيفطهم بحال لي كتدير الفيليبين وتستافد منهم قانونيا بحال لي كتدير مع العيالات دالفريز تولي تديرو مع الأطباء المهندسين صحاب لونسيجي، صحاب كلية الشريعة تسيفطهم لإفريقيا يعلموا خوتنا الأفارقة الإسلام المعتدل.