كود سبور//

مع كل دورة أولمبية كيشارك فيها المغرب، كيبان أنه كاين خلل كبير فالمنظومة الرياضية المغربية، اللي مازال ما قادراتش تعطينا أبطال رياضيين للي نجيبو بهوم ميدليات ونهزو بيهم علام البلاد، طبعا اللومة ما شي على الرياضيين ولكن على المسؤولين على الجامعات الرياضية للي صافي جا الوقت فين خصهم يتحاسبو.

هاد النتائج الهزيلة فأولمبياد فرنسا كتخلينا نتساءلو علاش حنا غادي نحصرو مشاركة بلادنا في التظاهرات الرياضية الدولية غير على الرياضيين لي غتعطينا الجامعات لي ما دايرة حتى زفتة، طبعا من غير جامعة الكرة؟؟

علاش ما نديروش بحال فرنسا محتضنة أولمبياد باريس 2024، بحكم أنها قريبة للمغرب فبزاف ديال الحوايج وكانت نموذج لبزاف ديال الجامعات الرياضية المغربية، وأبطالها الرياضيين حققو نجاح وجابو ميداليات فأولمبياد باريس2024، والزوين فالأمر أن هاد الرياضيين لي شاركو ما فيهموش غير لي تابعين للجامهات ولكن فيهم لي جاو من الجيش والجوندارم والبوليس وفيهم لخدام خدامين أخرين وقدرو يمثلو بلادهم أحسن تمثيل..

والأمثلة على هذا الشي كثيرة، كاينة كلاريس أگبيگنينو المتوجة بالميدالية البرونزية فالجيدو فأولمبياد باريس، هي أجودان فالدرك الوطني الفرنسي وكاينة الجيدوكا شيرين بوكلي اللي ربحت البرونزية وخدامة فلامارين، والجيدوكا لوكا ميخييدز اللي ربح الفضية وهو صولدا فالصف الأول، وكاين البيلوط الحربي نيكولا كيستان اللي ربح ذهبية الكاياك، وحسب الإعلام الفرنسي فوزارة

الدفاع والقوات المسلحة الفرنسية كتدعم الرياضيين اللي عندهم مستوى عالي وكايتنافسو فالرياضات اللي تمويل ديالها ضعيف، وهذا الشي كاين حتى الجوندارم وفالبوليس وقطاعات أخرى. إذن علاش الجيش والجدارمية والبوليس ديال بلادنا ما كيعطيوناش أبطال أولمبيين كيف ما عطاو لفرانسا، علاش ما نقلوش هاد التجربة ونستافدو منها حتى إلى ما جاتش بالجامعات تجي بالمؤسسات العسكرية والأمنية.