كود -وكالات //

شحال من مرة فقتي الصباح زربان وغادي طاير للمرحاض، وحسيتي بيك بحال إيلا شاد الخيط وما بغاش يسالي؟ هاد القضية ديال “البولة الطويلة” ديال الصباح راها ظاهرة طبيعية وكتوقع للبشر كاملين، وراها دليل على أن الذات ديالك خدامة مزيان ومنظمة بحال شي ساعة د المكان, ولكن واش عمرك سولتي راسك شنو كوقع لداخل ف داتك فاش كتكون ناعس؟

وخا النعاس كيرخي الذات كاملة، الكلاوي ديالك كيبقاو سهرانين وخدامين كيصفيو ف الدم من السموم والملاوح الزايدة. هاد السوائل اللي كيصفّيوها كتمشي دقة دقة للمثانة (النبولة). وبما أنك ناعس لواحد 7 ولا 8 د السوايع بلا ما تمشي للمرحاض، هاديك المثانة كتعمر حتى كتجيب التمام وتوصل للحد الأقصى ديالها.

ربي دار لينا واحد النظام واعر ف الذات: ملي كنعسو، الدماغ كيفرز واحد الهرمون سميتو الهرمون المضاد لإدرار البول (ADH) . هاد الهرمون خدمتو هي يفراني الكلاوي باش ما يخرجوش الما بزاف، ويخليو البول خاتر وقليل . لولا هاد الهرمون، كون كنا كنفيقو كل نص ساعة ف الليل نمشيو للمرحاض وما نعسو ما نقيلو! ملي كتفيق الصباح، هاد المفعول كيبدا ينقص، وديك الكمية المتراكمة والمركِزة كتلقى طريقها للخروج دقة وحدة.

السبب الثالث هو عضلات الحوض والمثانة بيدها. فاش يالله كتفيق، العضلات والروابط العصبية ديالك يالله كتبدا تفيق من “السبات” ديالها. هاد الارتخاء كيخلي عملية إفراغ المثانة تاخد وقت أطول وتخرج بانسيابية وثقل، داكشي علاش كتحس بالوقت طويل بزاف باش تسالي.