كود -وكالات//

إلى سبق ليك شفتي البنان اللي كيتباع فالمغرب أو فبعض الأسواق الأوروبية، يمكن تلاحظ أن بعض أنواع البنان، خصوصاً اللي جاي من كوستاريكا، كيكون كبير وطويل مقارنة مع أنواع أخرى، والسبب ماشي بالضرورة أن البنان الكوستاريكي مختلف وراثياً، ولكن كاينين مجموعة ديال العوامل اللي كتخليه يوصل لهاد الحجم.

أول عامل هو المناخ. كوستاريكا كتتميز بمناخ استوائي سخون ورطب، مع درجات حرارة مناسبة باش يكبرو أشجار البنان على طول العام تقريباً، هاد الظروف كتعاون النبتة باش تكبر دغيا

العامل الثاني هو الماء والتربة. مناطق إنتاج البنان فكوستاريكا كتتوفر على كميات مهمة من التساقطات، عاد أن المزارع التجارية كتستعمل كوتاكوت ونظام التهوية باش تحافظ على مستوى مناسب من الرطوبة، زيد عليها التربة الغنية بالمواد العضوية والمعادن كتساهم بدورها فالنمو.

كوستاريكا من أكبر الدول المنتجة والمصدرة للبنان، وكتعتمد بشكل كبير على أصناف موجهة للتصدير، خصوصاً صنف “كافنديش”. هاد الأصناف كتتميز بثمار متجانسة فالحجم والشكل، وكتتحمل النقل لمسافات طويلة.

ولكن واش البنان الكبير يعني أنه أحسن أو فيه فوائد غذائية أكثر؟ ماشي بالضرورة ،الحجم بوحدو ما كيحددش القيمة الغذائية ديال البنان، حيث البنان الصغير يقدر يكونو غنيي بالبوتاسيوم، الألياف والكربوهيدرات، والاختلاف كيكون غير فالقياس.

وبالتالي، فالبنان الكبير اللي كيجينا من كوستاريكا هو بالأساس نتيجة مزيج بين المناخ الاستوائي، التربة، الأصناف المختارة وتقنيات الزراعة التجارية، وماشي بسبب استعمال مادة سرية كتخلي البنان يكبر بشكل غير طبيعي.