محمد سقراط-كرد///

تقريبا يوميا كاين خبر على إعتقال أو متابعة او اغلاق الحدود أو استئناف محاكمة منتخب فاسد، في نفس الوقت ومن كورونا لهنا كاين ديما مواد إخبارية وفيديوات وصفحات تشيد بتدخل القياد ورجال الداخلية، قايد الولفة يحرر الملك العمومي قايدة سيدي بنور تنقص عشرين ألف ريال من ثمن الحولي، قايدة حورية كتنعس آسفي مع التمنية خوفا عليهم من كورونا، قايد شلالات أم ربيع تدخل باش يحرر الشلالات من القناطر العشوائية، وفي النفس الوقت منتخبي المنطقة غير كيتفرجوا، متتبع سطحي بحالي غادي يبانليه كاين تركيز كبير على إنجازات وتدخلات رجال الداخلية بينما العديد من المنتخبين فاسدين كلاو فلوس جماعات فقيرة، عطلوا التطور والتقدم في مناطقهم، وطبعا هادشي ماشي تجني عليهم راه هادو غير لي حصلوا.

أول انتخابات صوت فيها عي لي دازت صوت على الاحرار وهو لي كيسير المدينة، ولكن لقيت راسي مصوت على مافيا الفايق ومن معه والممثلين عليا في البرلمان راهم في الحبس حاليا، والمدينة يسيرها عمدة ضعيف عايش في ظل الولاة، بعدا واش كاين شي عمدة في المغرب ماعايش في ظل الوالي؟، وحاليا مكاينش أحزاب جديدة مكاينش وجوه جديدة او توجهات او وعود او برامج سياسية جديدة، كاين فقط صوت علينا باش ميطلعوش العدالة والتنمية عاوتاني، وفي نفس الوقت الدولة باغا تشجع المغاربة على التصويت علامن وكيفاش وباش الله وأعلم.

انا شخصيا الوحيد لي يستاهل نوض داكرالصباح ونمشي نصوت هو الوزير وهبي، ولكن للأسف وهبي كيمثل غير راسو وحنا وسط دوك الناس حكومتو وحزبو وماداعمينوش، مخلينو بوحدو يحارب التخلف، المنطقة فين ساكن المشاريع أي تدارت فيها لتحسين جودة الحياة منها بزاف خارية وبعقلية بدائية ديال التمانينات، وحتى هي مرتابطة بتوجه المركز واستطافة كاس افريقيا وكأس العالم، واش شي منتخب قتارح شي لعبة لا، اذن شنو هاد الحافز لي غادي يخلي المغاربة يصوتوا، راه خاص بث روح جديدة في الساحة السياسية في المغرب، تسهيل تأسيس الأحزاب وتكون جهوية بحال كاع الديمقراطيات، حزب رحماني حزب ريفي حزب صحراوي، عاد التوجهات السياسية من غير الإسلاميين طبعا خاص حضرهم، أو بلاش من هاد الانتخابات وندخلوا حتى حنا مع دول الخليج في داكشي ديال الحكامة الجيدة، وداك الساعة تتفرغ الداخلية لتسيير شؤون البلاد بلا ماتبقى مقابلة المنتخبين والفراشة ومحتلي الملك العمومي والشناقة في السواق.