عمر المزين – كود//

قال نور الدين عكوري، رئيس الفدرالية الوطنية لجمعيات آباء وأمهات وأولياء التلاميذ بالمغرب، باللي «فضوء المراسلتين اللي خرجات بيهم وزارة التربية الوطنية والتعليم الأولي والرياضة، وخصوصا المذكرة رقم 0821/26 ديال 6 فبراير 2026 المتعلقة بضمان الاستمرارية البيداغوجية فالمناطق المتضررة من الاضطرابات الجوية، والمذكرة رقم 0735/26 ديال 3 فبراير 2026 الخاصة باعتماد المنصة الرقمية والتطبيق TelmidTICE، كنعبّرو داخل الفدرالية على موقف إيجابي ومسؤول تجاه هاد المبادرات».

وزاد عكوري فالتصريح ديالو: “كنثمّنو هاد الإجراءات اللي كتبان حرص الوزارة على سلامة التلميذات والتلاميذ من جهة، وضمان استمرارية التعلمات وما يضيعش الزمن المدرسي من جهة أخرى، وكنعتابرو باللي اللجوء لحلول مرنة كتجمع بين التعليم الحضوري والتعليم عن بعد هو استجابة عملية للظروف الاستثنائية، وكيكرّس مبدأ تكافؤ الفرص بين المتعلمين”.

وشدّد المتحدث قائلاً: “هاد المبادرات كتحسب للوزارة وكتبان رؤية استباقية فتدبير الأزمات، ولكن النجاح ديالها غادي يبقى مرتبط بتعزيز التواصل والتنسيق مع الأسر، حيت هما شريك أساسي فمواكبة ولادهم وضمان الانخراط الفعلي ديالهم فالاستفادة من الموارد الرقمية والدعم التربوي المقترح”.

كما دعا رئيس الفدرالية، فالتصريح نفسو، إلى “مزيد من التوضيح والتواصل المنتظم مع أولياء الأمور حول مضامين هاد المذكرات وطرق تفعيلها على المستوى المحلي، خصوصا فيما يخص كيفية الولوج لمنصة TelmidTICE، وتدابير تعويض الزمن المدرسي من بعد ما ترجع الدراسة الحضورية، باش تطمّان الأسر ويتعزّز الثقة فالقرارات المتّخذة”.

وختم نور الدين عكوري تصريحو بالتأكيد على “الاستعداد الدائم ديال الفدرالية للتعاون مع الوزارة ومصالحها الجهوية والإقليمية باش تنجح هاد المبادرات، ويتضمن حق جميع التلميذات والتلاميذ فتعليم منصف ومستمر”.