كود مصطفى الشاذلي ////
فوزي لقجع رئيس الجامعة الملكية المغربية لكرة القدم باغي يبدل عقلية اللعاب ديالنا. بالنسبة ليه، باش كيشارك شي منتخب مغربي راه باش يربح. خاصو يتسلح فهاد العقلية. لقجع عندو يقين باللي الاسود غاديين يربحو كأس افريقيا للي غادية تنظم عندنا.
البارح لخميس 19 يونيو 2ّ025 فلقاء فمركب محمد السادس فالمعمورة بالرباط مع الاعلام المغربي. حضرو مدرب الاسود وليد الركراكي والصطاف ديالو، كرر هاد الخطاب. باغي يزرع هاد العقلية فكل واحد عندو علاقة بالمنتخب الاول هاد الفكرة. نربحو “لاكوب”. قال للركراكي “حيد اي واحد فلسطاف ديالك كيفيق وقبل ما يشرب قهيوتو ما كيقولش “غاديين نربحو لاكوب”.
لقجع ماشي جديد عليه. فكأس العالم 2018 فروسيا كان غادي وعينو على ربع النهاية. تقصينا فالدور الاول ولكن عندو فكرة واضحة. خاصنا نتسلحو فعقلية الرباح. كرر هاد الخطاب اكثر من مرة.
اي منتخب او نادي مغربي كيشارك فمنافسة دولية خاصو يحط هدفو: الرباح. يجيب الكاس.
كان لقجع نقل هاد الروح. هاد العقلية لوليد الركراكي فمونديال قطر. كررها فندوات تماك. قال باللي ما خاصش المنتخبات الافريقية تكتفي بالمشاركة. هادي فالحقيقة عقلية لقجع.
الركراكي بعد المونديال فقطر بعد على هاد العقلية. خطابو اليوم فيه بزاف من نظرية المؤامرة. كيكرر بدون سند باللي كاين اللي كيحاربو. وماشي مشكل ايلى كانو اللي يحاربوه اصلا. كيكرر باللي شي وحدين بلا ما يحدد اسمهم ما باغينوش يربح كأس افريقيا.
الركراكي خاصو يخرج من هاد العقلية. يرجع بحال لقجع. هاد الشي ممكن ايلى بغى هو طبعا
