گود سبور//

مسترة عقدة دوري أبطال أوروبا مع باريس سان جرمان الفرنسي، والفريق ما قدرش يوصل للفينال ونقصا من نصف النهائي مع بروسيا دورتموند الالماني.

وخسرو باريس سان جيرمان بالنجوم ديالهم مع بروسيا دورتموند فروتور دومي فينال دوري أبطال أوروبا اليوم الثلاثاء فبارك دي برانس فباريس، بنتيجة واحد لزيرو وهو الهدف اللي ماركاه نيكلاس فولگروگ فالدقيقة 36، وواخا المجهودات اللي دار اشرف حكمي وكيليان مبابي وصحابهم باش يرجعو فنتيجة الماتش ما قدروش، بعدما ضربت الكورة فالبوطو 4 المارات بالإضافة لتدخلات گول بروسيا دورتموند والمدافعين ديال الفريق الالماني.

وتأهلو بروسيا دورتموند بمجموع نتيجة لالي والروتور اللي هي 2 لزيرو، لفينال دوري ابطال اوروبا، وغايتسناو المتأهل من دومي فينال ريال مدريد الاسباني وبايرن ميونخ الالماني باش يعرفو الخصم ديالو فالنهائي، أما باريس سان جرمان ودعو المسابقة ومازال عندهم عقدة شومبيونزليگ اللي عمرهم ربحوها.

وللإشارة فإقصاء باريس سان جرمان الفرنسي ومع النجم المغربي اشرف حكيمي حرم الكورة المغربية من ضمان 2 لاعبين فالفينال ديال دوري أبطال أوروبا ، وضمان لاعب مغربي يربح اللقب، ودابا غايتأهل لاعب مغربي واحد للفينال اما براهيم دياز مع ريال مدريد الإسباني او نصير مزراوي مع بايرن ميونخ الالماني.