كود سبور//

عرف تسليم الاعتمادات الصحافية ديال ماتش الوداد الرياضي وإنييمبا النيجيري ضمن إياب ربع نهائي السوبر ليك الإفريقي، اليوم الثلاثاء شي مشاكل تنظيمية.

عملية سحب الاعتمادات الصحافية ديال ماتش الوداد وإنييمبا اللي مكلفة بها واحد الشركة متعاقدة معها الجامعة الملكية المغربية لكرة القدم، بإشراف من الاتحاد الإفريقي فتيران مركب محمد الخامس بالدار البيضاء، طفا فيها الضو وهاد الفرصة استغلوها الناس اللي خدامين فتسليم البادجات ومشاو يفطرو.

واضطرو الصحافيين يبقاو يتسناو واحد 40 دقيقة حتى رجعو كملو خدمتهم باش يعطيوهم البادجات ديالهم، مع العلم ان حتى شي صحافيين راه ما كيحتارموش النوبة وكيديرو الفوضى بحال واحد المصور اللي بغى يضارب مع واحد رجل الأمن الخاص خدام فتنظيم القاعة ديال الاعتمادات الصحافية.