وكالات//

تحكم على واحد الطبيب فكاليفورنيا بالحبس لعامين ونص، نهار الأربعاء، من بعد ما تدان بتهمة أنه عطى لنجم مسلسل “فريندز” ماثيو بيري مادة الكيتامين بطريقة غير قانونية، وهي اللي تسببات فموتو بسبب جرعة زايدة فـ2023.

الدكتور سلفادور بلاسينسيا اللي عندو 44 عام وكان مسؤول على عيادة قرب لوس أنجلوس، اعترف بالذنب فـ4 تهم ديال توزيع المخدرات بشكل غير قانوني، وتنازل على الرخصة الطبية ديالو، مع العلم أنه كان مهدد يوصل الحكم ديالو حتى لـ40 عام ديال الحبس.

فأكتوبر 2023، لقاو ماثيو بيري، اللي كان عندو 54 عام، طافي وما كيتحركش فجاكوزي فدارو فلوس أنجلوس.

وأكد تقرير التشريح أن الوفاة كانت بسبب “الآثار الحادة للكيتامين”، ومعاها عوامل أخرى خلاتو يفقد الوعي ويغرق.

الكيتامين هو مخدر قصير المفعول كيقدر يسبب الهلوسة، وكيستعملوه أحياناً فالعلاج ديال الاكتئاب والمشاكل النفسية، ولكن كيساء استعمالو بزاف كمخدر غير قانوني فالحفلات.

وبعدها اعترف بلاسينسيا بأنه هو اللي حقن ماثيو بيري بالكيتامين فدارو، وحتى فالمقعد الخلفي ديال طوموبيل واقفة، بلا أي سبب طبي قانوني.