الوالي الزاز -كود- العيون///
كيواصل وزير الشؤون الخارجية الجزائرية، أحمد عطاف، سلسلة لقاءاته مع مختلف المشاركين فالاجتماع الوزاري لحركة عدم الانحياز المنعقد على مدى يومي 5 و 6 بوليوز 2023، بالعاصمة الأذربيجانية باكو.
ودار وزير الخارجية الجزائرية مجموعة من اللقاءات اليوم الخميس، مع بزاف من نظرائه من دول أخرى بحال وزير خارجية فنزويلا إيفان خيل بينتو والأوغندي جيجي أودونغو، والنيبالي نارايان براكاش، والكوبي خيراردو بينالفير، بحيث هدر معاهم على علاقات بلادو معاهم وكيفاش يزيدو يتعاونو اقتصاديا ويطورو ديك العلاقات.
وكيف العادة وزير خارجية الجزائر جبد معاهم موضوع نزاع الصحراء، وبدا كيروج أطروحتو ليهم، بحيث عاود نفس الأسطوانة لي متعلقة بـ”حرب” كاينة فالمنطقة وخاص “مفاوضات مباشرة’ بين المغرب والبوليساريو، وبللي الجزائر ماشي طرف فالنزاع.
القاسم المشترك بين هاد البادان هو أنها ضعيفة سياسيا وديجا كدعم البوليساريو وعندها علاقات معاها، وما عندها أي تأثير على النزاع، واحمد عطاف عمّر بيها جدول أعمالو فظل عدم القدرة على استقطاب دول وازنة وإجراء لقاءات مع وزراء خارجيتها.
عطاف البارح دار لقاءات مع وزراء خارجية آخرين وفيهم لي دوا معاه على الصحراء بحال ديال تركيا هاكان فيدان، في حين ما جبدش النزاع مع نظرائو من أذربيجان ونيكاراغوا وسوريا وبيلاروسيا.
موضوعات أخرى
