كود سبور//

اكد الإسباني فرناندو سانز عضو اللجنة الاسبانية المكلفة بالتنسيق مع المغرب والبرتغال للتنظيم المشترك لمونديال 2030، أن الاتحاد الدولي لكرة القدم هو اللي غايحسم شكون غاينظم الفينال واش المغرب او الصبليون.

وكشف فرناندو سانز، فحوار دارو مع راديو “cope” التطورات ديال ملف ترشح اسبانيا مع المغرب والبرتغال لتنظيم مونديال 2030، وواش الصبليون مهددة بصح بالإقصاء من هذا الملف بسبب التحقيقات فشبهة الفساد داخل الاتحاد الإسباني لكرة القدم، وقال: “حنا خدامين دابا على الملف باش نسلموه للفيفا مع نهاية يوليوز الجاي، وراه كاينين متطلبات باش تكون قادر تنظم كاس العالم”.

وكمل المسؤول الإسباني: “فالربع الأخير غايمون اختيار المنظمين لكاس العالم 2030 و 2034، وما كاينش كيفاش يحيدو لنا التنظيم ديال المونديال وما كاين حتى إنذار او قلق”.

وبخصوص التنافس المغرب واسبانيا على تنظيم فينال مونديال 2030، قال المسؤول الاسباني: “دابا حتى حد ما مرشح باش ينظم الفينال حيث مازال ما كملنا، وحنا مرتاحين بزاف حيث دايرين خدمة متقونة واحترافية مع المغرب والبرتغال”.