الرئيسية > آش واقع > عضو اللجنة العلمية البروفيسور الإبراهيمي في حوار شامل مع “كود”: ها التأثير الخطير للسلالات الجديدة على الفاكسان.. وخاص استمرار الإجراءات الاحترازية باش نلقحو أكبر عدد وها قصة لقاح سينوفارم
15/02/2021 10:30 آش واقع

عضو اللجنة العلمية البروفيسور الإبراهيمي في حوار شامل مع “كود”: ها التأثير الخطير للسلالات الجديدة على الفاكسان.. وخاص استمرار الإجراءات الاحترازية باش نلقحو أكبر عدد وها قصة لقاح سينوفارم

عضو اللجنة العلمية البروفيسور الإبراهيمي في حوار شامل مع “كود”: ها التأثير الخطير للسلالات الجديدة على الفاكسان.. وخاص استمرار الإجراءات الاحترازية باش نلقحو أكبر عدد وها قصة لقاح سينوفارم

هشام أعناجي ــ مكتب الرباط//

كشف البروفيسور عز الدين الإبراهيمي، مدير مختبر البيوتكنولوجيا الطبية بكلية الطب والصيدلة بجامعة محمد الخامس بالرباط، في حوار مع “كود” عن تطورات الحالة الوبائية بالمغرب، وكل ما يتعلق باللقاح.

وقال الإبراهيمي، وهو أحد أعضاء اللجنة العلمية المغربية، في حوار خص به “كود”، إن “السلالات الجديدة تشكل خطورة على جميع اللقاحات وليس فقط لقاح استرازنيكيا”، مشددا على ضرورة الالتزام بإجراءات الحجر الصحي الجزئي بهدف إتمام عملية التلقيح في أحسن الظروف.

وأوضح المتحدث بالقول :”رأيي الشخصي هو يجب الاستمرار في هذه الاجراءات والانخراط فيها باش منديروش قرارات صعبة بحال بريطانيا اللي دارت حجر صحي شامل، خصنا نحافظو على الإجراءات”.

البروفيسور هضر على كولشي بخصوص اللقاح والحالة الوبائية والسلالات الجديدة، واللجنة العلمية المغربية، بالدارجة ختار يضشرح للمغاربة المواضيع للي كتهم صحتهم ومستقبلهم.

اليكم نص الحوار:

1/ “كود”: بعد بدء عملية التلقيح، كيفاش دايرا الحالة الوبائية فالمغرب؟ وعلاش  الإجراءات الاحترازية  باقي مستمرة واخا تراجعو الوفيات والحالات ديال الانعاش؟

البروفيسور الابراهيمي:

بالنسبة للحالة الوبائية، الأرقام الموجودة اللي فالمغرب كتعطي واحد التفاؤل ولكن تفاؤل حذر لأن دينامية تطور الفيروس ممكن تغير بسرعة كبيرة.

دبا اللي كاين عدد الوفيات نقص وحالات الانعاش نقصو بزاف، وهادشي جميل، وهادشي جا مور تضحيات جسام من الجميع من خلال الإجراءات الاحترازية التي فرضت في عدد من المدن، لذلك تفهم المغاربة الوضعية وتتبعوا البروتوكول العلاجي المغربي الذي ساهم في التقليل من الحالات الخطيرة.

كيسولوني الناس، فاش تحسنات الحالة علاش لا نحيدو الحجر الصحي الجزئي، انا كنقول العكس خاص نستمرو فالحجر الصحي الجزئي باش نحافظو على الحالة الوبائية المستقرة باش نتمكنو نلقحو عدد اكبر من المغاربة.

مع وصول الجرعات ديال استرازينيكا، نحن في صراع مع الزمن خصوصا مع السلالات الجديدة الخطيرة في سرعة الانتشار ولا تعترف بالحدود.

باش نمكنو نلقحو أكبر عدد ممكن من المغاربة، وباش نحميو الأشخاص في المرحلة الأشخاص في وضعية هشة، رأيي الشخصي هو يجب الاستمرار في هذه الاجراءات والانخراط فيها باش منديروش قرارات صعبة بحال بريطانيا اللي دارت حجر صحي شامل، خصنا نحافظو على الإجراءات.

2/ “كود”: كاينين بعض الحالات عندهم امراض مزمنة وأقل من 65 سنة، واللي عندهم 40 سنة مثلا، علاش ميكونوش ضمن الأوائل اللي غايتلقحو مادام هوما حالات مزمنة؟

البروفيسور الابراهيمي:

بالنسبة الأولوية لي تعطات للأشخاص، الكل تفهم بأن الأولوية لرجال الصحة والسلطة والتعليم، ونحميو الجنود والدرك الملكي والشرطة.

علاش بدينا بالأشخاص 65 سنة فما فوق ، حيث هوما الاغلبية اللي كيكونو فيهم امراض مزمنة وكيمشيو للانعاش. أغلب الناس اللي ماتو فالانعاش، عندهم معدل السن 67 سنة ونص للفوق.

الناس للي عندهم  40 سنة لفوق وعندهم امراض مزمنة بحال السكري والقصور الكلوي تا هوما  خاص يكونو اولوية فالمرحلة المقبلة.

3/ “كود”: ممكن توضحو لينا موانع اللقاح؟ شكون اللي مخصوش يديرو حاليا؟

البروفيسور الابراهيمي:

اللي بغيت نأكد عليه هو أن جميع الأشخاص خصهم ينخرطو في عملية التلقيح الجماعي خصوصا الناس اللي عندهم 65 سنة،  لأن اللقاح معمول أساسا لحماية هاد الأشخاص.

كاين ناس اللي عندهم موانع دائمة من اللقاح، كاين صنفين:  الصنف الأول هوما النساء الحوامل والنساء المرضعات، لأن هاد الناس معندناش عليهم البيانات الكافية لكي كتخلينا نقولو واش خاص يتلقحو ولا لا.

والصنف الثاني ناس اللي عندهم حساسية مفرطة، وللي كيوقع ليهم اختناق مور التلقيح، ماشي الحساسية ديال الماكلة ولا ديال الاشياء الخفيفة. هادو واخا يكونو هاد الحالات للي عندهم حساسية مفرطة فإن مراكز التلقيح مجهزة بجميع التقنيات لكي يتم انعاش هؤلاء الاشخاص، لكن قبل ما يخدو اللقاح خصهم يستاشرو مع الطبيب.

وبالنسبة لحالات المنع المؤقت، مثلا بنادم اللي مريض وجا يدير الفاكسان فيه الحمى والزكام، ميديروهش حتى يفوتهم الحال ويرجع يدير الفاكسان، وحتى الناس اللي كيدير العلاج الكيميائي بالنسبة لمرضى السرطان، هاد الناس ياخدو الوقت الكافي بعد أو قبل العلاج الكيميائي ب14 يوم تقريبا ويديرو الفاكسان، وضروري.

دائما نصائح الطبيب مهمة في الفاكسان.  وضروري نركزو على أنه اللي عندهم فوق 65 سنة وعندهم امراض مزمنة خاص ياخدوه. لأنه معمول اساسا لحمايتهم.

4/ “كود”: بعض الحالات اللي عندهم 65 سنة لفوق، ترددو يديرو فاكسان استرازنيكيا؟ واش باقي الجدل حول هاد المسألة؟.

البروفيسور الابراهيمي:

كاين نقاش كبير على أسترازينيكا، لذلك مدرناش تصريحات متسرعة وخدينا الوقت الكافي لأنه فهادشي ديال المسائل العلمية خاص يكون الانسان ثقيل وياخذ وقت ديالو.

ومن الناحية العلمية، التجارب السريرية ديال استرازنيكيا دارت على 700 شخص من بين 7000 شخص.

كاين رأي كيقول بلي هاد العدد ديال الاشخاص اللي دارو التجارب مكافيش باش ناس اللي فايتين 65 سنة ميستعملوش. وفي نفس وكاين مجموعة من الهيئات اللي قررت تستعملو، مثلا بريطانيا اعتمدتو واللي تجرات فيها التجارب السريرية، والهيئة الأوروبية اللي كترخص للدواء رخصت ليه وعطات ليه صلاحية الاستعمال لناس فوق 65 سنة، وكذا منظمة الصحة العالمية كذلك عطات الترخيص.

لكن الغريب في الأمر بعض الدول الأوروبية وبعض الهيئات الاوربية اللي مكنشكوش فيها وعندها منطق علمي رفضات استعمال اللقاح للناس فوق 65 سنة، رغم ان الهيئة الأوروبية قررت استعمال استرازينيكا تستعملو لناس فوق 65 سنة.

في المغرب، عندنا ما هو علمي نلتزم به من خلال المعطيات المتوفرة لدى اللجنة العلمية، وغذا ظهرت معطيات علمية جدا غدا ممكن نراجعو القرار.

5/ “كود”: كاين اللي كيقول جرعة واحدة تكفي، وكاين اللي كيقول 4 اسابيع مكافياش للفعالية، هل يمكن ان توضح لنا هاد المسألة؟

البروفيسور الابراهيمي:

الترخيص للقاح استرازينيكا في المغرب كان واضح، بحيث البيانات اللي عندو هو أن  استعمال الفاكسان غايكون أساسا بجرعة كاملة (ماشي نصف جرعة اللي دارت بعض الدول) وبعدها جرعة كاملة، وماشي نصف جرعة، وما بين الجرعتين  من 4 أسابيع إلى 12 أسبوع وفق الترخيص اللي عطات وزارة الصحة.

جات الآن مجموعة الدول كتقول استعمال نصف جرعة أو جرعة واحدة فقط بالنسبة للشخص المصاب، لكن لحد الآن مكاينينش بيانات من شركة استرازينيكا. وبالتالي نحن ننتظر البيانات.

اللجن العلمية في المغرب مافيهاش حسابات سياسية أو انتصار لجهة ضد جهة، بل الهم الأكبر هو المواطن.

6/ “كود”: واش كاينين دراسات مغربية على الفاكسان اللي دارو المواطنين والفعالية ديالو، مثلا لجنة اليقظة الدوائية لقات شي اعراض او لا؟

البروفيسور الابراهيمي:

بالنسبة للأعراض الجانية لجوج اللقاحات اللي استعملنا فالمغرب، كاين واحد المبدأ أو نتيجة مهمة كينساوها الناس هي أن جميع الأشخاص اللي  تلقحو في العالم بأي لقاح، لم يطورو أي أعراض  ولو إذا طوروا الكوفيد. اما كيتحماو أو كيطورو اعراض خفيفة. هنا تكمن اهمية اللقاح.

لحد الآن وصلنا للملايين من الأشخاص الذين تم تلقيحهم، لكن الاعراض خفيفة بجميع المنصات والتقنيات.

في المغرب هناك لجنة يقظة وبائية، والنتائج ديالها كتحتاج وقت وتجميع لاعلانها، ولكن لحد الآن مكاينش شي أعراض جانبية خطيرة.

وصنا لأزيد من مليون و300 شخص تم تلقيحهم فبلادنا، وهادي مناسبة للتنويه بانخراط جميع المغاربة وفخورين بهذه العملية اللي خلات المغرب ضمن الدول المتقدمة.

وأنا ديما كنقول بأن الفيروس علمنا التواضع كثيرا وخصنا ديما نكونو حذرين ويجب الاستمرار في الإجراءات الاحترازية التي قمنا بها، سواء على مستوى الدولة أو على المستوى الشخصي. لأن هذه الإجراءات هي التي ستمكن من اتمام عملية التلقيح.

حنا كنشوفو بريطانيا تسارع الزمن، السلالة الجديدة ولات سائدة عندها وهادشي كينقص فعالية اللقاح في بعض الأحيان، وحنا الحمد لله الوضعية مستقرة وخصنا نستغلو هاد الظرفية لتسريع اقتناء اللقاحات والتسريع بالتلقيح الجماعي مع وجود منظومة اليقظة الدوائية واليقظة الجينومية.

7/”كود”: بخصوص لقاح سينوفارم، اشنو وقع بالضبط مع الصين؟ وعلاش تأخر؟ واش مشكل فالتواصل ولا مشكل عند الصين؟

البروفيسور الابراهيمي:

بالنسبة لإقتناء اللقاحات وهذه نقطة مهمة لأن هضرت على تسريع اللقاحات هو أنه كاين واحد ضغط كبير، ضغط رهيب على اللقاحات كيما شتو اللي وقع بين اوربا وبريطانيا هادي اسبوعين كاين كسر العظام لسبب بسيط وهو انه لقاح استرازينكا يصنع في أوروبا وينتقل لاستعماله في بريطانيا وكاد أنهم يتشابكو بالأيدي ايلا بغينا نقولو. لأنه كاين واحد طلب كبير على اللقاحات.

هنا كايبان لينا انه كانولي المسألة الصحية مسألة تجارية وجيوسياسية، اذن حنا فالمغرب بهاد الاكراهات استطعنا نجيو اللقاحات.

وبالنسبة للقاح سينوفارم عندنا تعاقد باين معاهوم ورغم الإكراهات ليعندهوم كنظن، ومنساوش بأن الصين يجب عليها أن تلقح مليار و200  مليون او اكتر وهادي مؤسسات ديال الدولة اذن كايكون واحد بأنه  كيعطيو الأسبقية لبلاد ديالهم ولكن حنا المغرب من خلال الديبلوماسية ديالو من خلال الرجالات ديالو كاين نقاش مستمر مع هاد الأشخاص هادو من أجل يوفرو لينا اللقاحات، اذن الحمدلله حنا إلى حد الآن ايلا كنمشيو بهاد الوتيرة غانكونو  حمينا نسبة ديال 20% ديال المغاربة ليغا توصلنا الاشخاص لي فوق 50 سنة ان شاء الله غادي يكون عندنا امل كثير بأنه الصيف المقبل غايكون أجمل بكثير من الصيف ديال 2020.

8/ “كود”: امتى نرجعو للحياة الطبيعية؟

البروفيسور الابراهيمي:

اذن اللي بغيت نشير عليه بخصوص العودة ان شاء الله للحياة الطبيعية ، دايما كيسولوني الناس فوقاش نرجعو ليها .. كنقول راه مقرون تماما بما نقوم به، ماشي غير كدولة ومؤسسات وكلجان علمية ولكن كأشخاص كذلك.

اذن حنايا بهاد الانخراط بالمقاربة التشاركية خص كل مغربي يعرف بأنه بطل اذا التزم بهذه الإجراءات الاحترازية كحمل الكمامة و التباعد الجسدي وكذلك التعقيم وعدم التجمع الغير ضروري راه بطل.

اذن حنا بغينا هاد الناس ينخرطو فهاد العملية وتبقى هاد الإجراءات  التي اؤكد عليها علاش لأنه هاد السلالات خطيرة اذا كثرات.

علاش مابغيناش اتكاتر عندنا حيث ايلا وقع تكاثر كيأدي وينتج طفرات، وهاد الطفرات هادي كتكون غالبية ديالها ماشي داث أهمية، ولكن الى تجمعات كادير هاد السلالات.

9/ ما مدى فعالية كل من سينوفارم واسترازينيكا ضد سلالة كورونا الجديدة ؟

البروفيسور الابراهيمي:

الآن كاين ثلاتة ديال السلالات لي معروفين لي عندهم خطر باين هوما السلالة البريطانية ولي وصلات ل 82 بلد والسلالة البرازيلية تقريبا وصلات ل عشرة بلدان وكذلك السلالة الجنوب افريقيا لي وصلات تقريبا 40 بلد.

اذن حنا من الناحية العلمية السلالات من بعد مدة ديال اشهر معينة ستكون سائدة فالعالم غير حنا فالمغرب كلما تمكنا بأنه نلقحو الناس ديالنا ويكونو مستعدين ويعطينا الوقت باش نستاعدو لهاد السلالات راه مرحبا وغايكون شيء جميل جدا وعاد يكون مهم بالنسبة لينا.

علاش خطورة هاد السلالات هو أنها تؤثر على كثير من الأشياء لأنها كتنتشر بسرعة والشيء الثاني لعنهدها اللي مهم تؤثر على الفعالية والنجاعة ديال اللقاحات، جميع اللقاحات ماشي غير استرازينكا لي كيهضرو عليه بزاف د الناس بجميع اللقاحات لي استعملت ما بين بريطانيا و أمريكا وجنوب افريقيا تبين بأنه سلالة جنوب إفريقيا تؤدي إلى نقصان كبير ف النجاعة والفعالية ديال هاد اللقاحات.

اذن علاش هادا مهم خصنا نسرعو الزمن باش نلقحو الناس ديالنا باش قبل مايوصلو هاد السلالات هادي.

الشيء الثالت لي هو مهم هو أنه كثير من هاد السلالات لا سيما السلالة البرازيلية بدات  كتبين بأنه تال المرض كيولي صعيب شويا وكيتزاد الحرج ديال المرض والخطورة ديالو، وهذا يؤدي بطبيعة الحال  الى وجود أشخاص بأعراض حرجة والضغط على الإنعاش.

بالنسبة للسلالة البريطانية المشكل ديالها لي كبير هو سرعة  الانتشار ديالها كبيرة جدا، كنظن فاقت 75% بريطانيا والمشكل كيوصل الفيروس بسرعة لأشخاص في وضعية هشاشة اذن ملي كيوصل ليهوم بسرعة كيأدي ذلك الى ارتفاع عدد الوفيات، وهادشي علاش  كاينة سرعة كبيرة وسباق كبير ما بين السلالات والتلقيح ف بريطانيا. هاد الدولة كتسرع فالتلقيح لمحاصرة السلالة الجديدة.

وحنا بغينا فالمغرب نخافظو على الوضعية الوبائية باش نتمكنو نزيدو ف الوتيرة ديال التلقيح ديالنا ونسبقو وصول السلالات عندنا ان شاء الله.

10/ واش الناس اللي جاهم كوفيد 19 حتى هما غادي ياخدو جرعتين ولا غير وحدة؟

البروفيسور الابراهيمي:

الآن كاينة مجموعة ديال البروتوكولات فعدد من الدول باستعمال نصفة جرعة بعدم حقن الأشخاص إلا بجرعة واحدة ايلا كانو تصابو ب الكوفيد ولكن غي من ناحية العلمية لي بغيت نأكد ماكايناش اثباتات علمية في ذلك لأنه حنا كنديرو جرعتين للتأكد من مناعة كاملة بعد الجرعتين.

اذا كان شخص أصيب بالفيروس المرة الأولى ماكنعرفوش شحال ديال المناعة التي طورت وصعيب تعرف لأنه بزاف ديال الناس كايسحابليهوم راه ساهل تعرف المناعة التي طورت لأنه ماشي غير بطريقة ساهلة غاتمشي وتعبر الأجسام المضادة فالدم لا خصك تجيب  واحد التقنية  أصعب  من ذلك لي تمكن تعرف شحال ديال الأجسام المضادة التي تمكنت من مواجهة دالك الفيروس ماشي غير النسبة العامة ديال الأجسام المضادة .

بزاف ديال الناس كيستاهنو بهاد القضية هادي، اذن ايلا ماتمكناش نعرفو الإصابة بالفيروس شحال عطاتنا من المناعة من غاتجي دير البوستاج بحقنة واحدة ماكانعرفوش واش غاتوصلو ل نسبة 100% .

واذا تبين بأنه كاينة بيانات فهاد الميدان هذا وتبث ذلك فحنا مرحبا ولكن لحد الآن هاد البيانات غير موجودة والمغرب غادي يستمر فبروتوكول ديالو اذا بانت بيانات أخرى مرحبا، فالمغرب  عندو واحد المرونة كبيرة  والناس ديالو خدامة واللجان العلمية ديالو لحد الآن تعمل وتشتغل ليلا نهارا لمصلحة  المواطن المغربي.

موضوعات أخرى

26/02/2021 15:15

كلنا في العدالة والتنمية نعتذر لإلياس العمري! نحن الآن ننفذ برنامجك السياسي بحذافيره. ونقضي على الإخوان المسلمين. بأقل تكلفة ممكنة

26/02/2021 15:00

الداودي لـ”كَود”: الأحزاب الفاشلة باغية تحسب حتى الموتى باش تتهنا من البيجيدي والقاسم الانتخابي على أساس عدد المسجلين كيشبه لمسيرة “ولد زروال”

26/02/2021 14:30

ها مضامين الرسالة ديال 250 رئيس سابق ورئيس حكومة ومسؤول أوروبي ل جو بايدن اللي رحبو فيها بالإعتراف الأمريكي بمغربية الصحرا – وثيقة

26/02/2021 14:00

يساريون خلدو ذكرى مقتل الطالب ايت الجيد بنعيسى ف فاس.. و صحابو و عائلتو: خاص يتعاقبو كل المتورطين فهاد الجريمة و حنا مستمرين ف نضالنا من أجل العدالة – تصاور

26/02/2021 13:40

وضعية معتقلي “حراك الريف”.. مندوبية التامك: وضعيتهم عادية وظروف اعتقالهم مزيانة ولحباسات مفتوحة فوجه الهيئات الحقوقية باش تجي تشوف