وكالات//

قرّرات وحدة السيدة تركية عندها 105 عام تدخل للحياة السياسية فبلادها، من خلال الانضمام بشكل رسمي لأكبر حزب فالبرلمان التركي، اللي هي عاصرات تأسيسو قبل قرّيب لمية عام.

وجاو قياديين من حزب العدالة والتنمية الحاكم لبلدة كاهتا فمحافظة أديامان فالجنوب ديال تركيا، حتى لدار هانم أورمان، باش يسجلو الانخراط ديالها فالحزب رسمياً.

ودارت هانم البصمة ديالها بالإبهام على وثيقة الانضمام، وولات أكبر عضوة فحزب العدالة والتنمية من حيث السن، واللي كيتعدّى عدد المنخرطين فيه 11 مليون عضو.

وبانت المسنة التركية فصحة مزيانة، وكتتكلم باللغة الكردية ديالها بشكل مفهوم، رغم أنها بقات فالفراش ملي استقبلات وفد الحزب اللي انضمّات ليه.

وقالت وسائل إعلام محلية باللي أورمان هضرات فهاد اللقاء مع قادة الحزب الجديد ديالها على مواضيع بحال الاستثمارات، والاقتصاد، والصحة، والخدمات الاجتماعية، ودارت مقارنة بين المرحلة الحالية والمراحل اللي دازت.

وتزادّات هانم أورمان عام 1920، وبهذا عاصرات آخر أيام الإمبراطورية العثمانية، والانهيار ديالها، وتأسيس الجمهورية عام 1923 على يد مصطفى كمال أتاتورك.