أميمة عطية كود كازا ///

علمت “گود” من مصادرها الخاصة أن عصابة استغلات العطلة وهدوء ليلة عيد الأضحى، الأربعاء 4 يونيو، باش تشفر عدد من فيلات بريستيجيا، المدينة الخضرا فبوسكورة ضواحي كازا.

وحسب المعطيات اللي توصلات بها “گود”، فهاد العصابة كانت دايرة ماسكات بليبات ديال العيالات فوجوهم باش الكاميرات مايشدوهمش، وليبات خرين فايديهم على قبل البصمة ديالهم، وشفرات الذهب والفلوس لأكتر من 6 الفيلات، قبل ما يكتاشفو صحابها هاد السرقة من بعد العيد مباشرة ويبلغو جوندارم المنطقة.

ووفق معلومات حصلت عليها “گود” فعدد الفيلات اللي تشفرو وصل لأكثر من 6 دالفيلات فحين أن القيمة الإجمالية للمسروقات فايتة 10 مليون درهم.

وزادت ضافت، مصادر متطابقة أن فيلات خرين تسرقو ليهم حتا دياموند والذهب ومكانات غاليا “لوكس” ومبالغ مهمة، كاين لي بلغ عليها وكاين لي مقدرش يحط الشكاية ديالو.

وأكدت مصادر “گود” أن أفراد هاد لعصابة خداو من هاد لفيلات كاع الحصيصة اللي كانو مخبينها لعيالات ديال دهب ولفلوس لدواير زمان، واللي كانو صحابها كيجمعو فيها لسنوات.

وحسب ما شارت ليه المصادر نفسها، فهاد العصابة كانت كتعرف مزيان آش كتدير، حيت تمكنات من الدخول للفيلات وفتح البيبان، وحتى الكوفرات بطريقة ذكية، الشي اللي كيرجح أنهم كانوا واجدين للعملية ومخططين ليها مزيان.

القضية دابا في البحث، باش يتعرف واش هاد العصابة عندها علاقة بشي وحدين خدامين فالمدينة الخضرا، خصوصا بفيلات بريستيجيا اللي حدا الكولف، أو شفارا كانوا ساكنين تماك مدة قبل تنفيذ العملية واستغلو عطلة العيد باش يضربو الضربة ويمشيو.

وفي انتظار ما غادي تكشف عليه نتائج التحقيقات، مازال البحث متواصل باش يتفك لغز هاد القضية وتتحدد جميع الظروف والملابسات ديالها.