الرئيسية > آش واقع > عشية عيد الكبير.. المغرب رجع 20 مغربي كانو حاصلين فنيجيريا.. ومغاربة ميريكان ولبنان كيناشدو السلطات باش تتدخل لإرجاعهم
31/07/2020 12:30 آش واقع

عشية عيد الكبير.. المغرب رجع 20 مغربي كانو حاصلين فنيجيريا.. ومغاربة ميريكان ولبنان كيناشدو السلطات باش تتدخل لإرجاعهم

عشية عيد الكبير.. المغرب رجع 20 مغربي كانو حاصلين فنيجيريا.. ومغاربة ميريكان ولبنان كيناشدو السلطات باش تتدخل لإرجاعهم

عفراء علوي محمدي- كود//

رجعات السفارة المغربية بتعاون مع “لارام”، 20 مغربي كانو حاصلين فنيجيريا، بحكم أن الرحلات الجوية مازال ما نطلقات بين البلدين، بسبب فيروس كورونا المستجد.

ولبارح فالصباح رجعو المغاربة للبلاد، باش يقدرو يعيدو مع عائلاتهم وحبابهم اليوم الجمعة.

لكن فالمقابل، مجموعة من المغاربة فمناطق مختلفة من العالم مازال حاصلين، بحكم أن المغرب ماستأنفش رحلاتو مع جميع الدول، وكاينة دول ستثناتو من رحلاتها، وهذشي اللي خلا مغاربة كثار تتعذر عليهم العودة للوطن.

مغاربة كثار فميريكان والميكسيك والشيلي والبرازيل مازال حاصلين، كاين مغاربة خرين فدول إفريقية، والبعض الآخر فدول عربية ودول فجنوب شرق آسيا، وعاد اللي حاصلين فسبتة ومليلية والسبليون.

مجموعات العالقين على مواقع التواصل الاجتماعي بهتات شوية، والتفاعل فيها ضعاف، بحكم أن الأغلبية رجعو بحالهم، وآخرهم اللي جاو من نيجيريا، لكن مازال عشرات المغاربة كيطالبو بتدخل السلطات باش ترحلهم، ومنهم حتى المهاجرين اللي كانو بغاو يرجعو للمغرب باش يعيدو مع عائلاتهم وماتمكنوش بسبب تعليق الرحلات.

مجموعة على موقع التواصل الاجتماعي “فيسبوك” غيرات اسمها من “العالقين المغاربة” ل”اللاجئين المغاربة”، بعدما فقدو مجموعة من المغاربة الأمل فالرجوع.

موضوعات أخرى

04/08/2020 22:30

حصيلة كورونا فالأقاليم والجهات: جهة كازا تصابو فيها 422 وجهة الشمال ماتو فيها 5.. وأغلب المديريات الجهوية ماعلناتش على التفاصيل