كود الرباط//
كشفت مصادر مسؤولة لـ”كود” عن حقيقة الحادثة المؤلمة لشاب حرق الجسد ديالو قدام مقر البرلمان، مساء اليوم السبت 21 شتنبر الجاري.
وقالت مصادر “كود” بلي الشاب المنحدر من حي الانبعاث بسلا، وفعمرو 23 سنة، حرق راسو قدام مقر البرلمان على الساعة السابعة ونصف من مساء يوم السبت، وذلك بعد ايام قليلة من المشاكل العائلية لي عندو مع باه.
الشاب لي فعمرو 23 عام، كيتعاطى للمخدرات ومعروف فالحي ديال بسلا وفحالة يأس، وهاد السبب علاش جرا عليه باه من دارو قبل ايام.
وحسب مصادر “كود” هاد الحادثة معندها علاقة بأي سلوك احتجاجي، والضحية كيتواجد بمستشفى ابن سينا وكيتلقى العلاجات الضرورية.
وكانت القوات المساعدة إلى جانب عدد من المواطنين لي كانو فشارع محمد الخامس، ساهموا في إنقاذ الشاب العشريني.
الشاب كان غايدخل لواحد خدمة عمومية، ولكن بعدما كشفات التحاليل المخبرية بلي كيتعاطى للمخدرات تم ابعادو من الخدمة، ولكن هادشي دازت عليه مدة.
