الرئيسية > > عشرة أسباب خسراتنا مونديال 2026 اللي كان فالجيب: غدر السعودية ومعاها لعرب وترهيب ترامب ولجنة بريوس كثار ووجوه ديما تابعها لخسارة….
13/06/2018 12:10

عشرة أسباب خسراتنا مونديال 2026 اللي كان فالجيب: غدر السعودية ومعاها لعرب وترهيب ترامب ولجنة بريوس كثار ووجوه ديما تابعها لخسارة….

عشرة أسباب خسراتنا مونديال 2026 اللي كان فالجيب: غدر السعودية ومعاها لعرب وترهيب ترامب ولجنة بريوس كثار ووجوه ديما تابعها لخسارة….

كود موسكو ////

المغرب خسر تنظيم مونديال 2026 كيف سبق ونشرات “كود” البارح. خسارة متوقعة. تعددت الاسباب لهاد الخسارة. “كود” تقدم 10 اسباب. هاد المونديال كان قريب نديوه. نجمعات معطيات موضوعية واخرى ذاتية فهاد الخسران اللي بان هاد 3 ايام فموسكو

1/

بعنا المونديال قبل
نهار اللي تقدمات فكرة تنظيم المغرب لمونديال 2026 لمسؤولين فالدولة تقدمات على انها مربوحة يحكي مصدر “كود”. المصدر اكد ان اللي جاب الفكرة دار حسابات طلعو غالطين

2/
العدو السعودي العربي
من اكثر الضربات الما للمغاربة هي الضربة السعودية. قررات تصوت على الملف الثلاثي امريكا والمكسيك وكندا وفنفس الوقت تدعمهم ودير لوبيين باش يجيب ليهم اصوات. دارت دور خايب باش شوهات الملف المغربي. بعد السعودية تبعاتها الكويت والامارات والبحرين والعراق. يعني العرب كانو ضدنا

3/
مضاربة مع انفانتينو
لمغاربة دارو خطأ مع مرور الوقت. نقصاتهم الديبلوماسية. كانت مضاربة مع انفانتينو رئيس الفيفا. فالاول كانت العلاقة سمن على عسل٬ مع مرور الوقت ولات حنظل. طبعا هو كان باغي امريكا وما قالهاش واكتاشفوها لمغاربة متأخرين٬ لكن المشكلة ان لمضاربة معاه زادت ولعبات دور ولو ماشي حاسم فضياع مونديال 2026

4/
لجنة قبل تعيين رئيس لجنة مونديال 2026
هادي تخربيقة كبيرة. دابا عمليا مولاي حفيظ العلمي خدم اقل من 6 اشهر وداز الملف المغربي فالفيفا. جبنا المعدل بملاعب ما صالح حتى واحد وفق معايير الفيفا الجديدة وبقطاع ديال الصحة مهلوك وبطاقة استيعابية ماشي كبيرة ديال الفنادق. تأخير التعيين لعب دور سلبي بزاف فاش خسرنا.

5/
الخوف من ترامب

الملف المغربي ما كانش قوي عنيف لمواجهة الملف الاميريكي. “هادي راها ميريكان” يشرح مصدر ل”كود” من اللجنة. ما يمكنش نواجهوها واش حنا قدها. ضاربنا معاهم فالملف اييه ولكن فحدود” يضيف المصدر. لمغاربة خافو من ترامب وصافي

6/
مضاربة مع علي بن الحسن الاردني
الاردن دارت موقف حقير بحالها بحال السعودية وقررات تصوت ضد الملف المغربي. هاد الشي مناش؟ من شي مضاربة من رجلها القوي في اسيا علي بن الحسن وبين لمغاربة. ماشي ضربني نضربك ولكن سلمتي علي ما سلمتيش علي. ديتيها في ما ديتيهاش في. هاداك الشي ديال العرب. فالعمق الاردن طبقات تدوينة ترامب رئيس امريكا اللي قال كيفاش كنقدمو مساعدات لدول وما تصوتش علينا فالمونديال. الاردن معولة بزاف علي المساعدات ودعم ترامب

7/

بنيات تحتية واعرة طلعات فشوش
الملف المغربي واخا تقبل كانت فيه عيوب كثيرة، عيوب كتهم الملاعب٬ غاديين نهدرو عليها بوحدها٬ وعيوب كتهم البنية التحتية. عندنا مشاكل كثيرة بزاف فقطاع الصحة. صبيطاراتنا مراض وبزاف. هاد الشي بلا ما ننساو الفنادق. فزيارة وفد الفيفا للمغرب وقعو قصص ذكرات منهم “كود” بعضهم. بحال صبيطارات جابت سكانيرات من بلاصة اخرى وكانت اخرى غير ديكور حقاش فيها شي مشكل وما خداماش. هاد الشي وقع فمدن كبيرة يا حسرة

8/
الملاعب ما كاينينش
فضيحتنا لكبيرة هو ان اكتشفنا انه ما كاين حتى ملعب فيه معايير الفيفا الجديدة. فين سونارجيس اللي مكلفة بتدبير الملاعب. كيفاش ما فراسهاش هاد التعديلات وكان المغرب يستابق الامور ويصلح ما يصلح. ثم نقطة مقودة اخرى وهي ان بعض الملاعب كانت موسخة بزاف بزاف. غير الداخلية اللي عبئات كلشي اجهزتها باش تنقاش شوية. بحالها بحال بعض المطارات

9/
فرقة كلشي داير العشرة والشرويطة
تابعات “كود” بعض من عمل هاد اللجنة فموسكو فالدقائق الاخيرة. المشكلة لكبيرة اللي كانت عندها هو بزافت الريوس باغيين يحكمو. ما كنهدرش على مولاي حفيظ العلمي رئيس اللجنة المعين ولا فوزي لقجع رئيس الجامعة الملكية لكرة القدم =الصفة= وعلى اخرين كيتعتابرو نفسهم فوق كلشي. جاييين من الفوق ونزلونا التحت. ديما كتوقع. هاد اللجنة كان خاص يكونها مولاي حفيظ العلمي براسو. هو اللي يديرها. هو اللي يختار كاع الاعضاء ديالها. ما تجي لا سميرة سيطايل لا كمال لحلو لا العمراني اللي كان كاتب عام فالكاف ايام عيسى حياتو لا المارشيات يتوزعو قبل تشكيل اللجنة.

10/
جابو شي وحدين تابعاهم الهزيمة
هاد الملف كانو فعضويتو شي وحدين ما عمرهم شاركو فشي ملف وربحو. تابعاهم لخسارة. حشومة ديما نفس لوجوه. نفس لكمامر ونفس النتيجة الخسران وما كيبقاو فبلاصتهم. شوفو اعضاء اللجنة كاملين ماشي اللي بالصفة بل اللي تختارو من غير الرياضيين وغاديين تعرفو علاش خسرنا وغاديين نخسرو ايلى عاودو جابوهم

موضوعات أخرى

19/10/2018 17:45

التحايل معندو حدود فالمغرب. ركوب «مفروش» على قضية «الأمن فسلا» زاد كره المغاربة فالسياسيين وجبذ على صحاب المبادرة النحل ف «الفيس»