كود – وكالات //

شارك 150 ألف واحد، فتظاهرات عرفاتها 20 مدينة ألمانية البارح السبت، كاحتجاج على صعود حزب «البديل من أجل ألمانيا» اليميني المتطرف، كيف ماترفعات شعارات كطالب بمنعو .

وجات هاد الاحتجاجات من بعد الانتصار الكبير اللي حققو الحزب فانتخابات ولاية ساكسونيا-أنهالت بعدما جا اللول بـ 44 فالمية من الأصوات.

وتنظمات هاد التحركات فعدد من المدن، من بينها برلين وهامبورغ وميونيخ، بدعوة من حركة «بروف» اللي كتطالب بحظر الحزب.

ورفع المتظاهرون لافتات مكتوب فيها: «منعو حزب البديل من أجل ألمانيا دابا و«الديمقراطية ما محتاجاش بدائل».

وقال كريستوف باوتس، رئيس مجموعة «كامباكت» اللي شاركات فتنظيم الاحتجاجات، بلي فئة كبيرة من المجتمع المدني خرجات للشارع باش تمنع «أعداء الدستور»، فإشارة لحزب البديل من أجل ألمانيا فساكسونيا-أنهالت، من الوصول للسلطة.

وحسب مجموعة «كامباكت»، شارك 25 ألف واحد فتظاهرة هامبورغ، و12 ألف فميونيخ، كيف ما قال البوليس بلي آلاف الناس شاركو فاحتجاجات عرفاتها برلين.

وطلعات المطالب بحظر الحزب من بعد مفاوضات مع قوى سياسية ونواب آخرين، بهدف تشكيل أول حكومة إقليمية لليمين المتطرف فألمانيا من بعد الحرب العالمية الثانية.

وخا أن الحزب خدا 44 فالمية من الأصوات، مقابل 17 فالمية للاتحاد الديمقراطي المسيحي، ولكن  فشل بفارق 3 البلايص باش ياخد الأغلبية المطلقة.

وفالمقابل، نظم حزب «البديل من أجل ألمانيا» تظاهرة مضادة فالعاصمة برلين، شاركات فيها كريستين برينكر، المرشحة الرئيسية ديال الحزب فالانتخابات الإقليمية لي كاينة السيمانة الجاية.