عمر المزين – كود///

صدرات المحكمة الابتدائية الإدارية بفاس، زوال اليوم الثلاثاء، أحكامها فملفات ديال طلب عزل رئيس جماعة مولاي يعقوب الحركي الشرقاني الحسني و5 أعضاء آخرين، من بينهم نائبه الأول يوسف بابا.

وحسب ما علمته “كود”، فإن المحكمة قررت عزل الرئيس الشرقاني من رئاسة جماعة مولاي يعقوب بما يترتب عن ذلك من آثار قانونية، مع شمول الحكم بالنفاذ المعجل، شأنه شأن كل من يوسف بابا، محمد الأزعر، عبد الكريم بوعلام، رشيد رياحي، محمد محصون، الذين شملهم نفس القرار ديال العزل.

يذكر باللي هاد طلبات العزل كان تقدم بها عامل إقليم مولاي يعقوب سمير الخمليشي اللي كينوب عليه الوكيل القضائي للمملكة اللي داير محل المخابرة ديالو مكتب الخازن الإقليمي ففاس.

وفي سياق آخر، طالبات فعاليات من مولاي يعقوب باش العمل يدير نفس المسطرة فحق رئيس جماعة سبع رواضي بنفس الإقليم اللي كانت جات عندو المفتشية العامة للإدارة الترابية اللي عمرها كتجي لشي جماعة غير هكاك.

مصدر لـ”كود” أوضح باللي العامل الخمليشي غادي يسلك نفس المسطرة ديال العزل مع رئيس جماعة سبع رواضي.

يذكر أن توقيف رئيس جماعة مولاي يعقوب ومن معه جاء على إثر الزيارة للي كانت دارتها المفتشية العامة للإدارة الترابية، واللي دارت تقرير كحل يتضمن اختلالات خايبة عرفاتها هاد الجماعة التابعة ترابيا لجهة فاس مكناس.