كود الرباط//

المعارضة كتعيش انقسام كبير، مبقا عندها لا “توحيد المواقف” ولا دفاع مشترك فاش كيتعرض حزب كينتمي ليها لهجوم من وزراء ومسؤولي حزب رئيس الحكومة.

وهادشي تأكد اليوم، بحيث بلاصت ما تجتمع المعارضة وترد ودافع على حقوق المعارضة الدستورية، كولشي دخل سوق راسو وخلاو البي بي إس بوحدو كيواجه مدفعية وزراء الأحرار اللي مخلاو مقالو فحزب بنعبد الله نهاية هاد الاسبوع.

اليوم فندوة البي بي إس بمجلس النواب، قال محمد نبيل بنعبد الله، الأمين العام لحزب التقدم والاشتراكية، بلي ماشي راضي على داكشي لي مقدروش يديرو باسم المعارضة، مشيرا بلي حزبو دار لي عليه بلا ما يشهر راسو إعلاميا وسياسيا.

وأضاف بنعبد الله :”كنا صلة وصل وكنا الطرف الذي يسعى الى البناء المشترك، دون أن تكون لك رغبة في أن نشهر ذلك إعلاميا وسياسيا. لكي تكون للمعارضة كلمة أقوى. ونواجه العمل الحكومي”.

هنا بنعبد الله كيشير لادريس لشكر، الكاتب الأول لحزب الاتحاد الاشتراكي، حيث هو لي هضر ودار السياسة بملتمس الرقابة بلا ما ينسق مع المعارضة لي كانت كتقاد فيه.