گود سبور//

تشكاو الجزائريين للكاف والفيفا بسبب الماتش ديالهم ضد نيجيريا ضمن ربع نهائي كأس إفريقيا “المغرب2025″، اللي تلعب السبت اللي فات فـ تيران مراكش الكبير، وتقصاو حيث خسرو بنتيجة 2-0، وكايقولو إن التحكيم كان خايب، واخا راه هما اللي كانو خايبين ودارو تصرفات ديال اللي ما كايسواوش ملي تعداو اللاعبين ديالهم على حكام المباراة وتعداو الصحافيين ديالهم على الصحافيين المغاربة.

الاتحادية الجزائرية خرجو ببلاغ قبل لحظات كايقولو فيه: “لا يمكن إغفال القرارات التحكيمية في المباراة الأخيرة، التي أثارت تساؤلات وخلفت استياءً واسعا، حيث مست بمصداقية التحكيم الإفريقي، كما أنها لا تخدم صورة كرة القدم الإفريقية على الصعيد الدولي، وعليه راسل الاتحاد الجزائري لكرة القدم الكونفدرالية الإفريقية لكرة القدم، وكذلك الاتحاد الدولي لكرة القدم، من خلال إيداع شكوى رسمية مرفقة بطلب فتح تحقيق، قصد توضيح ما حدث واتخاذ الإجراءات المناسبة وفقا للوائح المعمول بها.

وكايحاولو الجزائريين يخبيو الإخفاق ديالهم ورا التحكيم، وتفرشو بزاف فـهاد كاس أفريقيا حتى أخلاقيا، سوا اللاعبين ديالهم او الصحافيين الجزائريين والجمهور الجزائري براسو، بعدما صدرت منهم شي حوايج ماشي ديال الناس للملاح، وراه الكاف افتح تحقيق فـهاد الشي، ومن المنتظر تكون عقوبات قاصحة عليهم.