أنس العمري – كود///

رجع اسم عثمان بنجلون، مول المال والأعمال فالمغرب، للواجهة بعدما تصدر قائمة أغنى المغاربة بثروة وصلات لـ2 مليار دولار، حسب تصنيف مجلة “فوربس” اللي خرج البارح الثلاثاء.

بنجلون، اللي عندو 93 عام وكيرأس بنك إفريقيا، زاد غير فهاذ العام 400 مليون دولار لثروتو، وطلع للمرتبة 14 فإفريقيا و1952 عالميا.

السبب الرئيسي فهاد القفزة هو الحصة ديالو اللي كتوصل لـ27.41 فالمية فبنك إفريقيا، اللي عندو فروع فـأكثر من 20 بلاد فالقارة. أسهم البنك طلعات بـ25 فالمية هاذ العام، وولات قيمتو السوقية 6.1 مليار دولار، وحصة بنجلون فيها كاتسوى تقريبا 1.7 مليار دولار.

لكن بنجلون ماشي غير فالبنوك، راه عندو استثمارات كبار عبر شركتو القابضة (FinanceCom) فالتأمين والتليكوم، ومن بينهم مشاركتو فـ”أورانج المغرب”.

وزيد عليها كيمتلك شخصيا مزرعة “أداروش”، اللي كاتعتبر من أكبر الضيعات ديال تربية المواشي فإفريقيا.

وبالإضافة لهاذشي، معروف هو ومراتو بالأعمال الخيرية، ومن بين الإنجازات ديالهم بناؤ مدارس فالعالم القروي. وحتى خذاو جائزة (David Rockefeller) فالـ2016 تكريما على هاذ المبادرات.