وكالات //

تحوّلات أجواء الفرح فواحد العرس فولاية أوتار براديش الهندية لكارثة، بعدما وقعت مدابزة كبيرة بسبب الشطيح، وتسببات في موت العريس من بعد ما تصاب بجروح خطيرة، فواقعة اللي صدمات الناس فذاك المنطقة وخدات اهتمام كبير فالهند.

البداية كانت ملي وصل موكب العريس للدوّار ديال العروسة وسط الاحتفالات والموسيقى والرقص، بحال ما كيكون فالأعراس الهندية. لكن الخلاف بدا أثناء طقوس تبادل أكاليل الزهور (الجيمالا) بين العائلتين، حيث بعض الحضور ما عجبهمش طريقة الرقص.

المشكل زاد تعقد، وحتى والد العريس حاول يهدي اللعب، ولكن بعض الناس اللي كانو سكرانين بداو كايضربو بالعصي. العريس، راكيش رام، دخل باش يحمي الأب ديالو، ولكن تعرّض لضرب خايب فالرّاس خلاه طايح بلا حراك.

فواحد الفيديو اللي دار البوز، باين شي واحد من اللي كانو مشاركين فالشجار كايتلوّح بمسدس ماشي قانوني وسط الرقص، ومن بعد ضرب العريس فالرأس بمقبض ديال المسدس، الشي اللي خلاه يطيح ويغيًب. تنقل راكيش للمستشفى المحلي، ومن بعد لمركز الطوارئ، ولكن مات متأثر بالإصابة ديالو.

البوليس فالهند دخل مباشرة فالبحث، وقدرو يعتاقلُو المتهم الرئيسي اللي سميتو فيشال، ولقاو عندو المسدس اللي ماشي قانوني ومعاه طلقة حية، حدا واحد القناة. ودّاوه للحبس باش يكملو معاه الإجراءات القانونية، والناس كتطالب بمحاسبة كل اللي تسببو فهاد المأساة.