علي الصافي -كود- كازا //

فالعرس الأسطوري لبنت محمد لمين حرمة الله القيادي بحزب التجمع الوطني للأحرار اللي داروه فكازا، قام أحد الفنانين الموريتانيين المعروف بتطبيلو لصحاب الشكارة اسمو زيدان، بتمجيد حمدي ولد الرشيد وغنى ليه نشيد طلع البدر علينا لي استقبلو بيه الأنصار للرسول فالوقت لي جاهر من مكة.

هاد الفنان بقى كيعاود فنشيد طلع البدر علينا فاللحظة لي جا فيها حمدي ولد الرشيد ومعاه النعمة ميارة رئيس مجلس المستشارين، وكان فاستقبالهم محمد لمين حرمة الله وولد خوه الراغب رئيس جماعة الداخلة. ولد الرشيد كان فغاية الانتشاء بهاد الاستقبال وفرحان بيه. صدق راسو بصاح واندامج فالدور.

الفنان الموريتاني بغى غير شي تدويرة كبيرة ولكن السياسي والرجل القوي فالاستقلال كان ناشط بزاف باغنية تغنات على الرسول فعام الهجرة.

كاين السياسة باللي هو رجل الصحرا القوي. حتى هاداك حرمة لعبها. هو من التجمع الوطني للاحرار ودخل فحلف مع حمدي ولد الرشيد باش يطحنو الخطاط ينجي رئيس جهة الداخلة الاستقلالي اللي كيواجه حمدي وكيواجه جبروتو.

اللي حضر للعرس بان ليهم ان لا محمد لمين حرمة الله ولا محمد سالم حمية رئيس المجلس الإقليمي للداخلة، عجبهم اغاني الفنان الموريتاني زيدان على حمدي ولد الرشيد وحتى هما دورو معاه مزيان.

غدا يرجعو ولد الرشيد من الهة الصحرا المقدسة