كريم الصوفي – كود//
عدم استقبال پيدرو سانشيث رئيس الحكومة الاسباني من قبل سيدنا فالزيارة اللي بداها البارح فالعشية وغادية تستمر اليوم٬ منوضة الصداع فالبلاد الجار. القضية ولات سياسية گاع بعد ما هاجم الحزب الشعبي المعارض سانشيث.
وكالة “إيفي” نقلا عن مصادر إسبانية رسمية٬ قالت باللي سباب عدم تخصيص استقبال ملكي لرئيس الحكومة الاسبانية٬ هو وجود محمد السادس خارج لبلاد. وهاذ الشي علاش كان اتصال هاتفي لمدة نص ساعة.
وزراء فالحكومة الاسبانية قالو باللي كان فراسهم باللي الملك ما كاينش
لكن صحف اسبانية منها “ال موندو” و”لاراثون” اعتبروه اهانة وضربة لحكومتو ولهاد الزيارة. دارو صورة كبيرة لوصولو للمغرب وفيها هاد لخبار. “اوكي دياريو” المعروف بمعارضتو لحكومة سانشيث جبد بيان الديوان الملكي بعد المكالمة٬ وقال باللي سيدنا ما بغاش يشوفو حتى يرجع فزيارة اخرى توجد كثر وتكون “مناسبة سانحة لتعزيز العلاقات الثنائية بشكل أكبر، من خلال اعتماد مبادرات ملموسة تتميز بالنجاعة، وبمشاريع فعلية في مختلف المجالات الاستراتيجية ذات المنفعة المشتركة”. هاد المقطع للي نقلاتو الجريدة راه خرج حرفيا فبيان الديوان الملكي.
