كود الرباط//

واحد اللغة استعملتها المعارضة اليوم خلال مناقشة الميزانية الفرعية لإدارة السجون، غريبة وعجيبة، كلها لحيس وصباغة لإدارة مندوبية السجون وللمندوب العام. كولشي كيقولو ليه “نتا زوين والحكومة خايبة”.

برلمانية فالتقدم والاشتراكية، ويا حسرة محامية، قالت “اللي معرفك خسرك” وزادت كتشكر فيه ووو وكطالب بإنصاف المندوبية.

كذلك مداخلة الفريق الاشتراكي، اللي تناولها سعيد باعزيز، اللي ما خلا ما قال على الحكومة ووزارة العدل ورئاسة الحكومة، وفي نفس الوقت شكر المندوبية وزاد وأكد بلي دار تقدم كبير في مجال حقوق الانسان داخل السجون رغم الإمكانيات القليلة.

غير هو اللي ماشي منطقي فهادشي كامل، هو أن المندوبية تابعة لرئيس الحكومة، ينتقدو رئيس الحكومة أه والمندوب لا، علما أن المسؤولية مشتركة.

العجيب لي شكرو المندوب العام هوما البرلمانيين المحامين، خصوصا وأنهم كيمشيو للسجون وكيتعاملو مع إدارة السجون، مداخلات فيها تضارب مصالح واضح.