عثمان الشرقي- كود //

الفنان الشعبي الأمازيغي عبد العزيز أحوزار خرج بتصريح قوي ومثير، هدر فيه على الطريقة ديالو فالتعامل مع الفرقة الفنية ديالو، والمشاكل اللي كيتصادف معاها فالميدان الفني، خصوصاً مع الشيخات اللي كيشكّلو الجزء البصري والفني من العروض ديالو، واللي تيكوْنو “لوحات فنية” كترجم الدبدبات الموسيقية.

أحوزار تيقول بصراحة:
“اللي ما حافظش على بلاصتو فالتشكيلة ديالي كيمشي فحالو، كاينين بعض البنات كيبغيو يدخلو ‘الشكلي فالعكلي’ ويديرو ‘حرفة فحرفة’، وأنا ما قابلش بهاد الشي.”
وبهاد الهضرة، بغا الفنان الشعبي يوضح أن بزاف من البنات كيدخلو فاختصاصات ما عندهاش علاقة بالميدان ديالهم، وكيبغيو يفرضو طريقة خدمتهم على النظام العام اللي دارو هو، واللي كيشوفو مجال مقدس خاصو الانضباط والاحترام.

وزاد أحوزار فتوضيحو:
“الخدمة ديال تاشياخت هي خدمتي أنا، شي حاجة أخرى ما عنديش معاها. الخدمة معايا خاصها تكون شريفة ومنضبطة، ماشي تفلية ، واللي فرّط يكرّط!”
الجملة الأخيرة “لي فرّط يكرّط” شافوها بزاف ديال المتابعين على أنها رسالة صارمة من الفنان، بمعنى أن أي وحدة ما احترماتش القواعد أو خرجات على قيم المهنة، خاصها تتحمّل العواقب والمسؤولية وتمشي فحالها.

ناقدين فنيين كيوضحو أن اللقب ديال “الطاغوت” اللي معروف به أحوزار، جا من الصرامة ديالو فالتعامل مع الفرقة، حيث كيراقب أدق التفاصيل، وكيمنع أي شيخة تخرج من بيتها فلوطيل بلا إذن منو، أو تعطي رقمها لأي معجب فالسهرات.

هاد الحساسية الكبيرة اللي عند الفنان على “الفراشات ديالو” كيزيد يأكدها فتصريحو:

“كاينين منظمين كيتصلو بيا وكيقولو واش كاينة فلانة، وكنجاوبهم: سمح لي، بلاصتي ما كايناش تما. اللي بغا يعيّط عليا يعيّط على الفن والإبداع ديالي مرحبا، أما اللي بغا يسول شكون معايا وشكون غا تجي، بلاش ما يعيّط ليا، وخا معرت شحال يعطيني ”

من خلال هاد التصريحات، كيبان أن عبد العزيز أحوزار باغي يحافظ على فرقة منضبطة ومبنية على التقدير والاحترام، وبعيد كل البعد على أي تجاوز أو استغلال يمكن يمسّ بكرامة الفنان أو سمعتو.