كود سبور//
أكد حفيظ عبد الصادق مدرب الرجاء الرياضي، أن الفريق واجد لماتش الجيش الملكي ضمن الجولة 5 من دوري أبطال افريقيا، والهدف ديالهم هو يربحو المباراة غدا السبت فمكناس، للحفظ على حظوظهم للتأهل إلى ربع النهائي، وقال انهم ما عندهمش مشكل بالنسبة لغياب جمهور الفريق الاخضر وان اللاعبين مركزين.
ووضح حفيظ عبد الصادق مدرب الرجاء الرياضي، خلال الندوة الصحافية اللي كاتسبق ماتش الرجا وليفار، وقال: “قلت للاعبين ننساو نتيجة الرباح ديال الماتش الماضي على صن داونز، حيث دابا عندنا نهائي ثاني امام فريق الجيش الملكي اللي فريق عريق ومتصدر للمجموعة وكان تجاوب من اللاعبين ونسينا الماتش اللي فات، وكان الاستعداد بحال التحضير للماتش الماضي بتركيز كبير لا من الناحية الدهنية او فالتداريب بحضور جميع اللاعبين والمساندة ديال اللاعبين ووجدنا مزيان”.
وكمل مدرب الرجاء الرياضي، وقال: “كانعرفو قيمة المنافس لعبنا معه الماتش الاول وخسرنا لكن هذا الماتش عندو طقوس اخرى، هما غايقلبو على حسم التأهل، وحنا غانقلبو على أننا نحافظو على الحظوظ ديالنا للتأهل واخا غانلعبو فواحد التيران اللي الارضية ديالو ما مولفينهاش ولكن اليوم فالحصة التدريبية غانحاولو أننا نولفوها، وغانكونو محرومين من الجماهير ديالنا ولكن هذا الشي كان على الطرفين وحنا ما عندناش شي مشكل ومستعدين، سوا كاين الجمهور ديالنا سوا ما كاينش، صحيح سنفتقدهم ولكن اللاعبين جادين وبالعزيمة ديالهم غانحققو الرباح”.