كود سبور//
قدر الرجاء الرياضي يربحو ماميلودي صن داونز الجنوب إفريقي، وينعشو الامال ديالهم فگروبات دوري ابطال افريقيا، بالرغم من الفرق فالإمكانيات حيث المدرب الرجاوي حفيظ عبد الصادق كان بوحدو فالطاقم التقني وما معه حد، وبالمقابل الطاقم التقني ديال الفريق الجنوب إفريقي كان عامر بالمساعدين ديال مدربهم اللي كل واحد عندو دور.
ووضح حفيظ عبد الصادق وقال خلال الندوة الصحافية اللي كانت ورا فوز الرجا على صن داونز بواحد لزيرو، وقال: “فالصطاف كنت بوحدي وهذا الشي ما يمكنش حيث اي فريق خاص يكون فيه الصطاف ريش، كيف شفتي الصطاف ديال ماميلودي صن داونز فيه 16 واحد، يعني إلى كان كل واحد كايعطي فكرة غاتاخد بزاف ديال الأفكار عكس ملي كاتكون بوحدك”.
وكمل عبد الصادق وقال ان هذا الشي كايبين ان اللاعبين عندهم بصمة كبيرة فالنتيجة اللي تحققت اليوم، وشكر حتى الجمهور اللي شجعهم، وتمنى انها تكون البداية ديال انطلاقة الفريق وما تكونش غير نتيجة وصافي.