كود – كازا //

كيقدم عبد الرفيع حمضي فكتابو الجديد «زمن الناس وتوقيت الدولة: مقالات على هامش الأحداث»، قراءة فالمجتمع المغربي انطلاقا من التفاصيل اليومية ديال الناس، وكيطرح من خلالها أسئلة على العلاقة بين المواطن والدولة، فواحد الوقت اللي كتعرف فيه المجتمعات تحولات متسارعة، وكتعاود تطرح فيه قضايا الحقوق والإنصاف والمسؤولية والعيش المشترك.

فالكتاب، كيخرج حمضي من التفاصيل الصغيرة ديال الحياة اليومية باش يناقش التحولات السياسية والاجتماعية، بلغة كتجمع بين التحليل والحكاية والمفارقة. وكيعتمد على الأحداث باش يفهم العلاقة بين المواطن والمؤسسات، ويسلط الضوء على المسافة اللي كاينة بين انتظارات المجتمع والإيقاع اللي كتجاوب به الدولة مع هاد الانتظارات.

والكتاب صادر عن مؤسسة باحثون للدراسات والأبحاث والنشر والخدمات الثقافية بالمغرب، وقدم ليه الباحث عياد أبلال، فيما كتحمل الغلاف ديالو لوحة للفنانة التشكيلية نادية الأزرق.

وكيضم هاد الإصدار 250 صفحة، فيها 70 مقال مقسمة على خمسة فصول، كتناقش مجموعة من القضايا المرتبطة بالذاكرة الاجتماعية والحقوق والدولة الاجتماعية والهجرة والتحولات الدولية والسياسة والانتخابات، إضافة لمواضيع الصحة والتعليم والأسرة والطفولة والعيش المشترك.

وبهاد الكتاب، كيواصل عبد الرفيع حمضي المسار ديالو فالكتابة على قضايا السياسة والمجتمع، من بعد كتابيه «مقالات في السياسة والمجتمع» و«قراءات في مغرب التحول»، وكيقدم للقارئ وللوسط الصحافي والإعلامي مادة للنقاش والتأمل، كتتجاوز التعليق المباشر على الأحداث، وكتحاول تقرا المعاني والأبعاد ديالها، وتفهم شنو كتكشف عليه من تحولات فالمجتمع وعلاقة الناس بالدولة.