كود الرباط//

ترمضينة خايبة دازت اليوم ف لجنة المالية، بحضور وزيرة الاقتصاد والمالية والمدير العام للصندوق الوطني للضمان الاجتماعي، فاش ناض برلماني كيغوت ووقف وحلف بلي هاد الاجتماع مغاديش يدوز.

هاد البرلماني هو رئيس فريق التقدم والاشتراكية، رشيد حموني، للي كعا وترمضن على رئيسة اللجنة زينة شاهين، وقال: “والله لا داز هاد الاجتماع”، وذلك بعدما رفض طريقة تجاهل رئيسة اللجنة مع طلبات المعارضة مقابل التجاوب مع الأغلبية.

حموني ماشي غير ترمضن وصافي، بل اتهم اللجنة بإهدار المال حيث عمرها دارت اجتماع منذ مناقشة مشروع قانون المالية 2025، أي منذ نهاية السنة وبداية يناير.

نفس المصدر قالي بلي تجاهل طلبات المعارضة حول الأسعار وغيرها هو للي تسبب لينا ف ظهور عبد الإله مول الحوت، موضحا بلي هاد عبد الإله خرج حيث البرلمان مكيديرش خدمتو.

رؤساء فرق المعارضة بلغو رئيسة لجنة المالية بلي قرروا ينسحبوا من الاجتماع، ولكن رئيسة اللجنة قالت بلي من الأحسن نرفعو الجلسة مؤقتا ونتفاهمو.

هادشي وقع خلال اجتماع لجنة المالية والتنمية الاقتصادية اليوم الاثنين 10 مارس 2025 مع 11 صباحا، بحضور وزيرة الاقتصاد والمالية بمعية المدير العام للصندوق الوطني للضمان الاجتماعي، لدراسة طلب فرق الأغلبية (فريق التجمع الوطني للأحرار، فريق الأصالة والمعاصرة، الفريق الاستقلالي للوحدة والتعادلية) والفريق الدستوري الديمقراطي الاجتماعي، يتعلق بالوضعية المالية للصندوق الوطني للضمان الاجتماعي.

الأغلبية متمسكة بالاجتماع، والمعارضة قالت بلي كاين خرق للنظام الداخلي وكتهدد بالمزيد من التصعيد وقررت الانسحاب ولكن مزال مخرجوش لحدود كتابة هذه الأسطر.