گود سبور//

كايواصل عبدو اللاي فال رئيس الاتحاد السنغالي لكرة القدم، العبث ديالو تجاه المغرب بتصريحات مستفزة وماشي مسؤولة، وكاتقزم بلادو والدولة ديالو قدام المغرب وأفريقيا والعالم.

عبدو اللاي فال اللي دار ندوة اليوم الخميس فباريس ديال هيئة الدفاع عن الاتحاد السنغالي لكرة القدم قدام المحكمة الرياضية الدولية فقضية الطعن اللي دارون السنغاليين ضد قرار لجنة الاستناف بالاتحاد السنغالي بسحب كاس افريقيا من منتخب السنغال ومنحو المغرب، وخرج فهاد الندوة وقال تصريحات مستفزة ضد المغرب.

وتهجم عبدو اللاي فال وقال: “الوضع صعيب فمواجهة ما يُعتبر أكبر عملية سرقة إدارية فالتاريخ، والاتحاد السنغالي لكرة القدم ما ناويش يبقى وقف مربع يديه، حيث هذا الشي كايتعلق بالدفاع على شرف اللاعبين ديالنا”.

وكمل عبدو اللاي فال، وقال: “وغاندفعو على مصالح لاعبينا  اللي تشفر منهم الرباح، وعلى مصالح الكورة الافريقية، وعلى المحابسية ديالنا (18 مشاغب من مشجعي السنغالي اللي تحكمو بالحبس فالرباط بعدما تدانو بالشغب والاعتداء على موظفي وأمن تيران مولاي عبد الله فالفينال)، ضحايا الابتزاز الديبلوماسي اللي ما عندو مبرر”.

التصريحات ديال عبدو اللاي فال رئيس الاتحاد السنغالي، كاتبين ان موقف ديالهم ضعيف بزاف، حيث بدل ما يركزو على الجانب القانوني للطعن فقرار الاتحاد الافريقي لكرة القدم قدام المحكمة الرياضية الدولية، ويعطيو للمحامين ديالهم باش يخدمو، ونايضين كايستفزو المغرب باتهامات كاذبة وما عندها حتى شي أسس واقعية، وكايزيد يتأكد ان هذا الشلاهبي ديال عبدو اللاي فال داير يديه من شحال هادي مع جهات مضادة للمغرب بعيدا عن كرة القدم، والمصيبة انه كايبين بلي بلادو السنغال مؤسساتها ضعيفة وان الدولة والحكومة خلاوه يجرهم لتسييس قضية رياضية خاسرينها، ويقدرو يخسرو حتى علاقاتهم مع المغرب وعدد من الدول الافريقية.