عن الاخبار ///

بزاف على الزهر يكون عمدة مدينة ورئيس جهة وحتى رئيس مجلس العمالة كلهم سوابق. هاد الشي وقع فالجهة الشرقية. فقد كشفت يومية “الاخبار” فعددها البارح الجمعة ان زهر سكان هاد المنطقة عوج. فرئيس الجهة الشرقية البامي عبد النبي بعيوي محكوم بعام حبس نافذ. كان رئيس فهاد الجهة وبقى فبلاصتو.

رجل اعمال كيحكم فكلشي فهاد المنطقة وكاع السياسيين تماك كيخافوه وحتى رجال السلطة كيترعدو منو.

عمدة مدينة وجدة السابق الاستقلالي عمر احجيرة حتى هو من صحاب السوابق محكوم عليه٬ وفق يومية “الاخبار”٬ بعامين حبس نافذ.

اما الثالث من صحاب السوابق اللي حاكمين مجالس وجدة كذلك بامي٬ هو لخضر حدوش اللي ولى هو رئيس مجلس عمالة وجدة. هادا مضروب بعامين حتى هو سجنا نافذا.

المشترك بين هادو تحكم عليهم بالحبس بتهمة تبديد اموال عمومية. دابا تعطاهم يدبرو هاد الاموال. منتهى العبث.

تفاصيل اكثر فيومية “الاخبار”…