كود – كازا ///

الرابور الفرنساوي من أصل إيڤواري، كاريس، غادي يطرا ليه ما طرا للرابور الفرانساوي- السينغالي بوبا، بعد انتشار دعوات على مواقع التواصل الإجتماعي لإلغاء الكونصير ديالو اللي غادي يتنظم نهار 24 جوان الحالي فبواط فطنجة.

الحجة ديال هاذ الجهات، هي أن الرابور الفرنسي، كاريس، هان المراة المغربية في وقت سابق ووصفها بـ”العاهرة”، وناضو شي وحدين بداو حملة عبر “تويتر” وسم بعنوان: “لا لاستقبال كاريس بالمغرب”، قالك عبروا من خلاله على الغضب ديالهم وطالبو السلطات باش تدخل وتمنع إقامة الحفل.

وفماي الفايت، رفضات سلطات كازا السماح بإقامة حفلة ديال “بوبا” ، حيت عاوتاني كانو طلبو بمقاطعة الكونصير ديالو بسبب اتهامه بالإساءة للمغربيات في بعض أغانيه، حسب ما أفادت الجهة المنظمة للحفل.

هادشي ماشي معقول وكيبينا مكلخين ومبرهشين ومكنفهمو والو فالفن امام العالم!

اش گال بوبا كاع فالدياسك ديالو ، گال “Petite marocaine se tape Berlusconi” وگال “Je vais à la chicha que pour les beurettes”. علما ان بوريت كاتقال على گاع بنات شمال افريقيا والمغربيات ففرنسا بصح كيمشيو لقهاوي الشيشة، وبنت الفقيه بن صالح فعلا نعسات مع برلسكوني. وشنو گال كارييس ؟ قال المغربيات عاهرات، اوا راه عندنا العاهرات بحالنا بحال العالم كامل! واش كنسمعو المريكانيين باغيين يمنعو درايك حيت هو كنادي وسب المريكانيات؟؟ وقال على وحدة منهم “بيتش”؟ لا! علاش؟ حيت بعقلهم وكيفهمو شناهو الراب ! الراب فن دالزنقة فيه السبان والمعيور والتهديد وگاع المشاكل دالزنقة!

خاص المغاربة يتصالحو شوية مع ذاتهم، ومايبقاوش يجيبو النفس على الخاوي والتخربيق… وزيد ان المغربيات قادات بشغلهم ومامحتاجات لحد يدافع عليهم ويدير حملة حيت رابور قال فديسك ان وحدة منهم طاحت مع الرئيس الطالياني السابق، ولا كتعجبهم الشيشة و و و و…