كود الرباط//

عرفت نسبة ملء السدود بالمغرب ارتفاع مهم يزاف فهاد الأيام الأخيرة، بفضل التساقطات المطرية اللي عرفتها عدة مناطق، حيث وصل المعدل الوطني دابا لـ37,03 في المائة، وهو رقم كيقرب بزاف لحاجز 40% بعد شهور طويلة واكثر من خمس سنوات ديال التراجع والضغط المائي والجفاف.

وحسب المعطيات اليومية الرسمية الصادرة اليوم الأحد 28 دجنبر 2025، فإن المخزون الإجمالي ديال السدود بلغ أكثر من 6,2 مليار متر مكعب من أصل طاقة استيعابية إجمالية كتفوق 16,7 مليار متر مكعب، وهو تحسن ملحوظ مقارنة مع الأسابيع الماضية.

عدد من الأحواض المائية سجل نسب ملء مشجعة، خصوصاً حوض سبو اللي واصل لأكثر من 45%، مستفيد من الأمطار المهمة فالشمال، وحوض أبي رقراق لي قرب لـ90%، وحوض اللوكوس حافظ على مستوى مهم بفضل انتظام الواردات المائية.

في المقابل، مازال التفاوت كيبان بين الأحواض، حيث بعض المناطق خصوصاً فالجنوب والجنوب الشرقي كتسجل نسب أقل، رغم التحسن المسجل مقارنة مع نفس الفترة من السنة الماضية.