كود: حد السوالم//

بمجرد ما تعيّن العامل الجديد ديال إقليم برشيد، جمال خلوق، البارح الاثنين 26 ماي الجاري، خرجات مجموعة ديال الفعاليات الجمعوية والتجار فـحد السوالم باش يجددو طلبهم بفتح تحقيق ف”الصفقة المشبوهة” ديال المعرض التجاري وسرك الألعاب اللي دارت ضجة فـالمدينة.

هاد السرك والمعرض تدارو بلا ترخيص، وتحطو قرب الطريق، وهو ما زاد فاختناق حركة السير وخلق منافسة غير شريفة للتجار اللي كيساهمو بالضرائب وعندهم التزامات قانونية. وهادشي خلى بزاف ديال التجار يستاؤو وكيعتابرو هاد الأنشطة ضارة بمصالحهم.

مصادر من المدينة قالو ل”كود” أنه من بعد ما تنشر المقال ديال جريدة “كود”، تحركو بعض المسؤولين وأمرو بإيقاف النشاطات ديال السرك والمعرض، حيث تأكد أن ما عندهم لا ترخيص لا والو، وحتى الكهرباء اللي كانو خدامين بيها، كانت مربوطة بطريقة عشوائية من أعمدة الإنارة العمومية، وهو ما وصفوه بــ “سرقة ديال الضو”، مع العلم أنهم دارو عداد صوري باش يغطيو على الخرق.

كيتقال حتى أن بعض المستشارين من النواب ديال الرئيسة فجماعة السوالم مستافدين من هاد الصفقة، وكيحاولو يدفعو الرئيسة ديال المجلس باش تصادق على الترخيص ديال المعرض والسرك، رغم أن القانون ما كيسمحش بهاد النوع ديال الأنشطة، اللي كتضرب فرزق التجار المحليين وكتشجع سلع صينية على حساب الصناعة التقليدية ديالنا.

المتضررين كيطالبو العامل الجديد يتدخل ويحقق فـهاد الصفقة اللي كيعتابروها “ملغومة”، خصوصا أن البعض باغين يديرو مهرجان التبوريدة باش يغطيو بها على المعرض، مع أن الهدف الحقيقي هو الربح المالي، بلا ما يعتابرو مصالح الساكنة ولا الجماعة، لأن نشاط بحال هذا في جماعة سيدي رحال القريبة داز في صفقة جابت لخزينة الجماعة حوالي 300 مليون سنتيم.

الناس اليوم كيتسناو تدخل صارم، وقرارات تحمي الاقتصاد المحلي وترد الاعتبار للتجار اللي كيخدمو بالقانون وكا يخلصو الواجبات ديالهم.