كود كازا ///
كاين استياء كبير من قبل سكان وأعضاء جماعة دار بوعزة على عامل النواصر شاطر. حسب تصريحات هادو ل”كود” كيقولو باللي ممثل السلطة “ما بغاش يفهم الدرس اللي جاه من السوالم، اللي انتاخبوا رئيس جماعة ما عندوش أغلبية حزبية، واختاروا واحد شافو أنه يقدر يقود القافلة بعيدا عن الحسابات السياسية اللي تسببات كارثة ووقفات عجلة التنمية”.
هاد ليام الجماعة تتوجد لانتخاب الرئيس، بعد عزل الرئيس السابق وإرسال ملفه للقضاء الإداري، اللي صدر الحكم فيه بالعزل، لكن الغريب في الأمر أن العامل، اللي هو المسؤول الأول في الإقليم كيتاهمو منتخبين بالتدخل
حسب شي منتخبين هدرات معاهم “كود” باللي السي العامل داير جهدو كامل باش يفرض عضوة من البام، باش ينتاخبوها رئيسة، وملي شاف القضية مشداش، حيث كاين تنافس من قبل عضو آخر تينتمي لحزب غير ممثل في الحكومة.
منتخب اخر هدر على رجل البام القوي اللي كيحكم حتى هو فالاقليم داير تحالف مع السلطة باش يحط هاد البامية علي رأس جماعة دار بوعزة. مشاكل ديال هاد المسؤول كيعتاقد غادي يتحل منها شوية بهاد الانتخاب.
دابا حسب منتخبين ل”كود” رافضين تدخل السلطة. رافضين حزب التراكتور فدار بوعزة بعد فضايح كثيرة دازت فمراحل سابقة. باغيين وجه جديد. رافضين حسب تصريحاتهم ل”كود” تدخل الداخلية فالانتخابات وباغيينها تبعد.
وزارة الداخلية ممثلة فالعامل خاصها تبدا محايدة. تخلي المنتخبين يختارو اللي بغاو” يشرح منتخب ل”كود”. واخر مشى بعيد فتصريحو ل”كود” “حنا عارفين كيفاش كيكون التسيير. ما يمكنش يوقع اللي وقع فدار بوعزة والمنتخب يتحاسب =وحنا مع هاد المحاسبة= ولكن رجل السلطة ديما هو الرجل الصالح. كنهدر على اللي كيوقع فالحقيقة ماشي فالنصوص. راه كاينة مسؤولية للعامل فاللي وقع قبل وفاللي غادي يوقع غدا”
هاد المنتخب عطا ل”كود” مثال على الوكالة الحضرية اللي خدمات رونات باش تعرف اقليم النواصر ووقفات على اكثر من 4 الاف بناية عشوائية فعهد السيد العامل. واش الجماعات الحضرية بوحدها مسؤولة علي هاد الشي؟ طبعا اللا.
منتخبو جماعة “دار بوعزة” باغيين يفشلو مخططات توجدات قبل. باغيين يعاودو تجربة حد السوالم وما مسوقينش لاي واحد كيخطط باش يحط هاديك البامية اللي ما عندها لا تجربة لا معرفة لا وعي بمهام رئيس جماعة يؤكد منتخبون ل”كود”.
