هناء ابوعلي – كود//
هاذ الويكاند شعلات العافية فسكن مخصص لعاملات الفريز فالجنوب الاسباني. وساىل إعلام اسبانية وصفات الحريق بالمدمر، وتسبب فخسائر مادية للممتلكات الشخصية و قالت باللي اغلب المتضررين مغاربة.
لحد الساعة تا مسؤول حكومي مدار شي إجراء باش يطمئنوا على هاذ العاملات ويطمئنوا عائلاتهم.
هاذ العاملات مجرد بريكول تواصلي عند كاع الوزارا اللي دازو. مكاين غي الأرقام والتصاور، وشي مكاسب مادية أو اجتماعية مكاينة. بلا منهضروا على الشروط الانتقائية اللي كتركز على شروط مهينة، أولها تكون عاملة الفريز مزوجة وعندها الدراري و الهراري، أو تكون مطلقة بالدراري، يعني الاسرة ديال هاذ المرا مسوقهمش فيها، وتكون فوق هاذ الشي محرتكة وضارب الكيلو ميترات فتمارة ويكونو يديها حرشين بحال ديال البناية وهاذ الشي كيقلبوه ليهم فالمقابلة النهائية وكيون الصبليون كيتفرجوا على عيالاتنا اللي داي رمعاهم الفقر والبؤس كونطرا غير مفتوحة.
هاذ الشروط اللي كتعبرعلى المزوجينية ديال المسؤولين اللي كيضبرو هاذ الملف الاجتماعي، وكيتاجرو بيه فالأرقام ديال التشغيل و فالسياسة، خاصها تبدل.
الى متى نبقاو نشتتوا أسر على قدها على 4 آلآف أورو لا تساوي شيئا قدام خراب أسر وتشرد أطفال وتعرضهم لكل الويلات طيلة أربعة أشهر مدة غياب امهاتهم.
هاذ الشي بلا منهضروا على طبيعة العمل المضنية واللي كتطلب من المرأة فترة عمل كتوصل لـ 8 سوايع و أكثر فظروف مناخية صعبة وفي ظل أوضاع ماشي ساهلة من حيث السكن و التغذية اللي كتفرض على لعيالات التقشف والبيض وأتاي والزيت طيلة ربع اشهر باش يوفرو شوية ويرجعوا يحلو مشاكل اسرهم وعائلاتهم.
هاذ الطريقة ديال التشغيل ولات مسيئة للمغربيات والمغرب يلا مدخلتش الوزارة باش تحسن ظروف العمل والأجور وتوقف الشروط الاسبانية المجحفة واللي مبقاتش مقبولة.
علاش الجمعيات النسائية مكيهضروش على هاذ الوضعية. واش عادي تشعل العافية فين ساكنين هاذ العاملات وحتا مسؤول حكومي ميتفاعل مع الحدث، خصوصا وزير التشغيل يونس السكوري اللي كان كياخذ معاهم التصاور نهار كانوا غاديين وملي شعلات فيهم العافية ضرب الطم. واش عاملات الفريز مجرد أرقام كنحسنوا بها صورة الوزارة والحكومة، حيث الملاحظ أنهم ملي كيبغيو يمشيو كيضربو ليهم الطر تقول مصيفطينهم لكونجي سانك إيطوال وملي كتجي فيهم حتا واحد مكيديها فيهم.