كود سبور//

خرج عادل رمزي مدرب الوداد الرياضي ملي وصل الفريق إلى المغرب راجع من جنوب إفريقيا، كيدافع بقوة على اللاعبين ديالو واخا خسرو لقب السوبر ليك الافريقي البارح الاحد مع ماميلودي صن داونز الجنوب افريقي، وبكل شجاعة حماهم من الانتقادات السلبية واكد انه كيفتاخر بالمستوى اللي قدمو فالمسابقة، وان جزئيات وعوامل كانت مهمة في الخسارة وحسم اللقب.

وبعدما وصلو الوداد الرياضي قبل لحظات لمطار محمد الخامس بالدار البيضاء، قال عادل رمزي فتصريح له: “كنتأسفو على ضياع اللقب.. كنا تايقين فالقدرات ديالنا والمسار اللي درنا فالسوبر ليك الدراري واللاعبين قدمو مستوى كبير ولكن للأسف ما قدرناش نكملو هذا الشي فالماتش الاخير كانت عوامل مهمة مؤثرة منها العامل البدني ولعبنا مع 3 ديال العشية”.

ورد عادل رمزي على المنتقدين، وقال: “بزاف انتاقدونا على طريقة اللعب ديالنا فالفينال بلي زعما كنا كندافعو، ولكن حنا كنا تايقين بلي غنضغطو وتايقين فالهجوم ديالنا ولكن راه الراس بغا والرجلين ما بغاوش، وعلى العموم أنا مفتخر بالعرض اللي قدموه اللاعبين وما كتابش، ولكن العرض ديالهم كان مشرف كنا قراب والفينال تحسم بجزئيات صغيرة ما كرهناش هاد لاكوب ودابا مازال عندنا واجهات اخرى لاعبين عليها ونحاولو نعوضو لجمهورنا هذا الشي”.

وختم عادل رمزي بميساج لجماهير الوداد الرياضي وقال: “القوة ديالنا هو جمهور الوداد سوا اللي كيسافر معنا او اللي كيشجعنا هنا فكازا والوداديين ديال حميع أنحاء العالم وباغيين نشرفوهم، هذا اللقب ضاع منا”.