نجوى المالحي-كود//

البارح المغني عادل إيشبي لي كان مع مجموعة “the 5” وتشهرو في برنامج “اكس فاكتر” دار أول أغنية في مشوارو solo.

المثير أن عادل بان بنفس اللوك ديال سعد لمجرد، فوطوطوكوبي ديالو محطوط.

المخرج أمير رواني دار ليه نفس الإخراج ديال أغنية “لمعلم”، الكليب فيه بزاف ديال الألوان والدريات والطوموبيلات والشجر والصحرا.

والتبرگيگة لي جابت “كود” أن مدير أعمال عادل الجديد بعدما فرتكها مع الكروب لي فيه المغنيين من لبنان ومصر والجزائر، هو رضا البرادي لي كان مدير أعمال سعد لمجرد قبل ما يتفارقو ملي تشد في القضية اللولة ديال الاغتصاب.

الأغنية سميتها “سمعي” والكليب تصور في نواحي مراكش، والتورناج استغرق سيمانة تقريبا والانتاج ديال شركة sony.