كود الرباط//

كشف مصدر إسرائيلي لـ”گود” بأن حسن كعيبة، نائب السفير الإسرائيلي فالرباط، قدم استقالته رسميًا وقرر الرجوع لإسرائيل ابتداءً من اليوم الثلاثاء. هاد الخطوة جات بعد شهور من الضغوط والصراعات الداخلية داخل مكتب الاتصال الإسرائيلي فالرباط.

المصادر كتشير باللي كعيبة عاش أجواء خايبة داخل المكتب، ملي كان كيتعرض للتمييز والعنصرية بسبب هويته كعربي مسلم. السفير الإسرائيلي يوسف بن دافيد، المعروف بمواقفه المتشددة، لعب دور كبير فهاد التوترات، وزاد عليها تدخل القنصل العام دوريا أفيداني، اللي كتوصفها المصادر كشخصية متسلطة كتفرض رأيها على الكل.

كعيبة، اللي كان عندو دور مهم فتقريب العلاقات مع المغاربة، اضطر ياخذ هاد القرار بعدما لقى راسو محاصر بين العنصرية والضغوطات المهنية. القرار ديالو مغادرة الرباط كيعتبره مراقبون مؤشر على فشل داخلي فمكتب الاتصال، لي باين باللي كيعاني من صراعات كبيرة.

’’گود” سبق ليها هضرت فمجموعة مقالات على المشاكل الداخلية فمكتب الاتصال الإسرائيلي فالرباط. واليوم، تقديم حسن كعيبة مشا فحالو وهادشي  كيزيد يعمق الأزمة. هاد الخطوة كتعكس صورة سلبية على مكتب الاتصال الإسرائيلي، وكتطرح تساؤلات على مستقبل العلاقات الإسرائيلية المغربية، خصوصا وأن هاد النوع ديال الصراعات كيبعد على الأهداف الدبلوماسية الحقيقية.

واش غادي تكون هاد الاستقالة بداية لإعادة النظر فطريقة تسيير المكتب؟ أو غادي تزيد المشاكل تتفاقم؟ كلشي كيبان مع الأيام الجاية.