كود الرباط//

حدث رياضي وفني فرنسي بامتياز تم التسويق له بزاف هاد الأيامات من طرف شي شركة تواصل مغربية، تلغا اليوم. هاد الحدث غايكون فيه نقل مباشرة للديربي الفرنسي بين باري سان جيرمان ومارسيليا وغايحضر فيه الفنان ستورمي فمنصة السويسي OLM بالرباط.

العصبة الأولى الفرنسية قالت فبلاغ توصلت به “كود” بأن الحدث تلغا لأنه مخداوش التراخيص اللازمة. هادشي جا فسياق ازمة كبيرة بين باريس والرباط، بانت بقوة فالتأشيرة وانتقلت للفن والثقافة.

حرب الكل في الكل. المغرب كيرفض اي تعامل مع أي دولة بدون اعتراف بمغربية الصحراء.

الغريب فهاد الازمة، شركة تواصل مغربية خدامة مع الفرنسيس كادير ليهم تسويق لفنهم ورياضة ديالهم وتنقل الديربي وسط العاصمة، ودارت اعلان كبير باش محبي الكرة والفنان سترومي يحضرو لمنصة السويسي.

السلطات المغربية كان عندها رأي اخر. اللا مغاديش تاخدو التراخيص ديال الحفل.

هاد الشركة لي روجات للحفل مولاتها هي حياة جبران، خت الوزيرة السابقة ثريا جبران.