عمر المزين – كود///

صدرات غرفة الجنح العادية فالمحكمة الابتدائية بالرباط، نهار اليوم الثلاثاء، الحكم ديالها فحق اليوتيوبر رضا الطاوجني، اللي كان متابع بتهم القذف ونشر ادعاءات كاذبة بهدف التشهير، ونشر معطيات شخصية بلا رضا أصحابها، والمس بالحياة الخاصة ديال الأفراد عبر وسائل التواصل الاجتماعي.

وبخصوص الدفوع، قررات المحكمة عدم الاختصاص المكاني فالبداية، ولكن من بعد ردّات هاد الدفع واعتابرات المحكمة الابتدائية بالرباط مختصة محلياً باش تبث فالقضية. وفما يخص الشكاية المباشرة، تقرر عدم قبولها فشق جنحة نشر وقائع كاذبة بهدف المس بالحياة الخاصة، مع قبولها فجنحة القذف بعد رفض باقي الدفوع الشكلية.

وفالدعوى العمومية، صرّحات المحكمة بمؤاخذة المتهم محمد رضا الطاوجني من أجل جنحة القذف، وحكمات عليه بغرامة مالية نافذة قدرها 100 ألف درهم، مع تحميلو الصائر وجعل الإكراه البدني فالأدنى.

أما فالدعوى المدنية التابعة، تقبلات شكلاً، وفالموضوع حكمات المحكمة على الطاوجني يخلص للأمير هشام العلوي تعويض مدني إجمالي قدره 600 ألف درهم، مع الأمر بحذف الفيديو والمادة الصحفية اللي فيها القذف من قناتو فـ”يوتيوب”، ونشر مضمون الحكم فنفس الصفحة وعلى نفقة المحكوم عليه، داخل أجل 15 يوم من بعد ما يولي الحكم نهائي.

كما قررات المحكمة ترجع مبلغ الضمانة اللي كان دايرها المطالب بالحق المدني من بعد خصم الرسوم، مع تحميل الطاوجني الصائر ورفض باقي الطلبات.

وكان الأمير هشام العلوي دار شكاية ضد الطاوجني بسبب تصريحات خرجات فـ11 شتنبر اللي فات، فواحد الفيديو على قناتو، واعتبر باللي فيها اتهامات وكلام كيمس الشرف والاعتبار ديالو.

وسبق للأمير هشام وقال باللي لجأ للقضاء كمواطن باش يطالب بالإنصاف وفق القانون، مع تأكيدو على الإيمان بحرية التعبير، ولكن بشرط تكون بعيدة على التشهير.