عفراء علوي محمدي- كود//

قررات المحكمة الابتدائية بالرباط، اليوم الاربعاء، عدم قبول الدعوى الاستعجالية اللي ارفعها المحامي محمد الكَصي ضد سلسلة “قهوة نص نص”، واللي اعتبرو “فيها إهانة ومس بسمعة مهنة المحاماة”.

المحامي عمر الداودي، اللي كينوب على زميلو فهذ الملف، قال فتصريحو ل”كود” أن هذ الحكم كان متوقع، خصوصا وأن السلسلة قربات تسالي مع نهاية رمضان.

ورجح المحامي كذلك يكون عدم قبول المحكمة للدعوى راجع لكونها ترفعات من طرف محامي، فيحين النقابة هي المخول لها رفع هذ الدعاوى، “لكن هذا مجرد احتمال”، على حد قولو.

وزاد: “هذشي كلو كيبقى مجرد احتمالات، حيت لحد الساعة مازال ما طلعناش على تفاصيل الحكم وحيثياتو، لانه مازال ما خرج كوثيقة لبين يدينا وعندنا دابا المنطوق فقط”.

وهذ الدعوى الاستعجالية كان رفعها الكَصي ضد المسلسل،بسبب شخصية المحامية اللي كتأديها فيه الممثلة بديعة الصنهاجي، وتعتبرات “كتسول الزبائن فالقهوة وكتدير استشارات قانونية وتفرق ليكارت فيزيت”، وهذ الشي اعتبرو المحامي فيه اهانة للمهنة ومس بمكانة المحامي الاعتبارية.

لكن فالمقابل، بزاف دالمعلقين رفضو هذ النوع من الدعاوى ضد الإنتاجات الفنية، على اعتبار ان فيها مس بحرية الفن والتعبير.