كود سبور///

علمت “كود سبور” أن فريق المغرب الرياضي الفاسي، قرر اليوم الثلاثاء، إقالة المدرب أكرم الروماني من تدريب الفريق الفاسي، وذلك بعد خلافات وقعت مؤخرا بينه وبين بعض اللاعبين، وعلى رأسهم اللاعب طارق الستاتي.

مصادر مصاوية قالت باللي أسباب إقالة المدرب الروماني تعود إلى انسجامه مع بعض اللاعبين بعد المباراة ضد النادي المكناس، وهي المباراة التي انتهت بفوز الكوديم على الماص بثلاثة أهداف مقابل هدف واحد.

وكشفت مصادر “كود سبور” أن اللاعب الستاتي كان تساب مع المعد البدني لي كانت جابتو الماص من القنيطرة، خلال حصة التداريب ديال الفريق الفاسي انهار الخميس للي فات، وداك الساعة تدخل المدرب الروماني باش يهدن الوضع لكن داك اللاعب الستاتي ناض عاود كيسب حتى المدرب.

الأمور غادي تكبر وغادي يوقع الاحتقان انهار الماتش ديال الماص والجديدة. فحسب مصادرنا، فإن المدرب الروماني رفض يعيط للاعب الستاتي باش يجي يلعب هاد الماتش وتما وقعت حالة من التوتر، وتدخلات إدارة الفريق وقررت إقالة المدرب.

مصادر “كود سبور” استغربت من إقدام إدارة الفريق على إقالة المدرب الروماني، علما أن الرجل جاب نتائج واعرة، مضيفة أن ما وقع في حصة التداريب انهار الخميس الماضي كان خاص اللاعب الستاتي هو لي يتم اتخاذ إجراء فحقو عوض المدرب اللي مشا ضحية والفريق غادي يخلص دبا الثمن، وكاين عدد من المسؤولين في الفريق الفاسي ضد هاد القرار.

وفي ذات السياق، كشفت مصادر “كود سبور” أن الفريق الفاسي بدا دبا كيقلب على مدرب جديد حقاش مزال عندو عدد من الماتشات، ويقدر يجيب شي مدرب من فرنسا أو من دولة رومانيا.