وكالات//

أثار حادث خايب جديد نقاش كبير على السلامة ديال تصاميم الطوموبيلات ديال “تيسلا”، من بعد ما ماتت طالبة أمريكية عندها 19 عام وسط طوموبيل من نوع “سايبرتراك” اللي شعلات فيها العافية من بعد ما ضربات فشجرة، وماقدراتش تهرب حيث البيبان الكهربائيين ماخدامينش.

الكسيدة وقعات فشهر نونبر اللي فات فمدينة بييدمونت فولاية كاليفورنيا، وخلّات ثلاثة الناس ميتين، من بينهم الطالبة كريستا ميشيل تسوكاهارا، اللي كانت كتقرا فجامعة سافانا ديال الفنون والتصميم. وكان معاهوم راكب رابع اللي بقى حي ولكن تصاب بكسور وخطر.

الوالدين ديال الضحية، كارل ونويل تسوكاهارا، دّاو القضية للمحكمة ضد شركة “تيسلا”، وقالو أن بنتهم ما كانتش مجروحة بزاف، ولكن ماتت مخنوقة ومحروقة من بعدما شعلات الباتري ديال الطوموبيل وماقدراتش تخرج، حيث البيبان ماخدامينش بلا كهرباء، وزيد عليها، المقبض اليدوي ديال الطوارئ صعيب باش توصل ليه فالكرسي اللوراني.

المحامي ديال العائلة، روجر دريير، قال أن الهدف من الدعوة هو باش يبينو الخصاص اللي كاين فأنظمة السلامة ويحسبو الشركة، وقال أن الموت ديال البنت كان ممكن يتفادى إلا كان كاين نظام ديال الطوارئ اللي كيخلي الناس يخرجو بسرعة فحالة العافية أو انقطاع الضوء.

ورغم أن “تيسلا” ما قالت والو رسمياً حتى لدابا، هاد القضية رجعات النقاش ديال السلامة فالطوموبيلات الكهربائية ديالها للساحة من جديد.